کوئٹہ۔ 02 نومبر (اے پی پی) ڈپٹی کمشنر خضدار میجر(ر) بشیر احمد پارینے کہ ناجوڑی تیان پاک و جان جوڑ مننگ ہرراج اکن بے کچ المی ءِ، جان جوڑراج اسے نا ٹہیفنگ کن ہراڑے حکومت و ہیلتھ انا ادارہ غاک تینا زمواری تے پورو کننگ ءُ ، ہموڑے الس ہم انفرادی و اجتماعی وڑاٹ اوار مرسا داقومی فرض اٹ تینا بشخ ءِ اوار کے، اسیجائی کوشست آتے اٹ ہی ناجوڑی تیان بچفنگ نا قومی مہم ءِ سرسہب کننگ کینہ۔ خضدار اٹی دُوانزدہ دے ئی سورُک تور ، روبیلا ویکسین خلنگ و پولیو نا چٹفنگ کن پڑی کنفنگ نا قومی مہم بنا کننگ ءِ داڑکن ہر اسٹ تینا دنگ انا حداسکان کوشست آتے کاریم اٹ اتسا دادے سرسہب کے، تانکہ ننا پوسکن آ چین ءِ ہراناجوڑی تا خطرہ مون تروک ءِ اوفتا توننگ کن کڑد ادا کرسا اجرعظیم نا حقدار مرین۔ داخیال آتا درشانی ءِ او تینا دفتر اٹی ’’ڈسٹرکٹ اوور اسٹیئرنگ کمیٹی میٹنگ نا کماشی ءِ کرسا کرے۔ دیوان اٹی ایم آر ایمونزئیشن مہم ءِ سرسہب کننگ نا بابت سجفنگا سلاہ پیش و اہم فیصلہ کننگا۔ سورُک تور و روبیلا ویکسین خلنگ نا مہم 15 نومبرآن بناکرسا 27 نومبراسکان برجاسلک داڑتون اوار پولیو تور مہم ہم برجاسلک۔ ہندا بڑزکو ناجوڑتیان بچنگ کن برجاسلوک آ دُوانزدہ دے ئی مہم اٹ سورُک و روبیلاغان بچفنگ کن نہہ سال آن پانزدہ سال اسکان نا 3 لکھ 21 ہزار 399 چناتے ویکسین خلنگک، ہنداوڑ پانزدہ نومبر آن بیست ءُ ہفت نومبر اسکان ہندادے تیٹی پولیو تور مہم ہم برجاسلک، ہراٹی (اسہ لکھ 33 ہزار 263 چناتے پولیو نا پڑی کنفنگ نا ہدف ءِ مقرر کننگانے ہراٹی ودی مننگ آن ہلیس پنچ سال اسکان نا چناتے پولیو نا پڑی کنفنگک۔ دیوان اٹی اے ڈی سی جی سراج احمد بلوچ ڈی ایچ او خضدار ڈاکٹر سومارخان بلوچ، نیشنل اسٹاپ آفیسر خضدار ڈاکٹر شفیع دانش، ڈاکٹر محمد عمر، سیاسی راہشون و السی نمائندہ میر عبدالرحمان زہری، عبدالرحمان صالح زئی ، ڈی ایس پی پی ایچ آئی خضدار شفیق احمد مینگل ڈی او فیمیل خضدار زاہد مصطفیٰ ، ڈی ای او میل خضدار منظور احمد بلوچ ، بی آر ایس پی خضدار نا پروگرام منیجر بلال احمد گچکی ، پی پی ایچ آئی نمائندہ سیف اللہ شاہوانی پی پی ایچ آئی سوشل موبلائزاعجاز احمد جام، ڈپٹی ڈی ایچ او ڈاکٹر بشیر احمد بنگلزئی ڈاکٹر عبدالصمد آئی ڈبلیو ایچ او، ڈسٹرکٹ مانیٹر ایم آر محمد یوسف، ظریف شاہوانی و ایلوفک ساڑی ئسر۔
