اسلام آباد۔1نومبر (اے پی پی):دری کارانی وزیر شاہ محمود قریشی ءَ گشتگ کہ پاکستان، آسٹریلیا ءِ گوما اقتصادی ، بیپاری، وانگ ء ُ زانگی، دیمپانی، کشتء ُکشاری ، سائنس اینڈ ٹیکنالوجی ءِ پڑآں دونیمگی کمک ءَ را گیش کنگ ءِوائشت مند اِنت، میاں اوستمانی براتی، اوگان شہری آنی معاشی ء ُ انسانی بنیات آں کمک کنگ ءِ ھاترءَ محکمیں ء ُ اثر مندیں گامگیج چست بہ کنت۔ دوشمبےءِ روچءَ دری کارانی جارچین ءِ ردءَ دری کارانی وزیر شاہ محمود قریشی ءَ گوں آسٹریلین در ی کارانی وزیر ماریس پین ءَ ٹیلیفونک نزیکی کتگ۔ شاہ محمود قریشی ءَ گشتگ کہ اوگانستان ءِ نزیکیں ہمسائگ بوہگ ءِ ارزشت ءَ پاکستان ، اوگانستان ءَ جنگ ء ُ جدل ءَ چہ گیش آماچ بوتگ، اوگانستان ءَ چِل سال جنگ ء ُ جدل ءَ پد امنءُ ایمنی بوہگ ءِ اُمیت ودی بوتگ۔ دری کارانی وزیر ءَ آسٹریلوی دری کارانی وزیر ءَ کابل ءِ بازیں ملک آنی سفارتی عملہ، میاں اوستمانی ادارگانی اہلکار ء ُ میڈیا نمائندگانی چہ اوگانستان ءَ زوت درآیگ پاکستانی کمک ءَ چہ سرپد کتگ ء ُ گشتگ کہ پاکستان ءَ 37 ملک آنی 21 ہزار مردم چہ اوگانستان ءَ درآیگ ءَ کمک کتگ اَنت۔ دری کارانی وزیر ءَ گشتگ کہ آسٹریلیا ءَ نندوکیں یک لکھ 25 ہزار ءَ چہ گیش پاکستانی ء ُ بازیں آسٹریلو ی وانگ ء ُ زانگی ادارگاں داخل 12 ہزار ءَ چہ گیش نودربر، دوئیں ملک آنی نیام ءَ دونیمگی سیادی ءِ نمونگ اَنت۔ دری کارانی وزیر ءَ آسٹریلوی دری کارانی وزیر ءَ را کورونا وائرس ءِ ہوپ ءِ سوب ءَ آسٹریلیا ءَ وانوکیں پاکستانی نودربرانی سفری جیڑہ ء ُجنجالاں چہ سرپد کتگء ُ ٹریلول ایڈوائزری ءِ سرءَ چمشانک دیئگ ءِ ضلورت ءِ سرءَ زور پِر داتگ۔ دوئیں دری کارانی وزیر آں پاکستان ءُ آسٹریلیا ءِ نیام ءَ دونیمگی سیادی ءِ سرءَ سدکی ءِ درشانی کتگء ُ آئی ءَ را گیش محکم کنگ ءَ جزم ءِ درشانی کتگ۔ در ی کارانی وزیر ءَ آسٹریلوی دری کارانی وزیر ءَ را پاکستان ءِ ترء ُتاب کنگ ءِ دعوت داتگ کہ آئی ءَ گوں منت واری ءَ قبول کتگ۔
