نئی دہلی۔ 09 اپریل (اے پی پی) بھارت نا دے ٹکی ریاست اوڈیشہ نا شار بھدرک اٹی ہندو و مسلمان تا نیام اٹ بیدادی نا واقعہ غاتیان پد کرفیو نافذ کننگانے۔ میڈیا رپورٹ نا رداٹ سوشل میڈیا غا ہندو تا دیوی دیوتا رام و سیتا نا بارواٹی مبینہ وڑاٹ قابل اعتراض تران آن پد بھدرک اٹی پنچ شنبے نا دے آن بنا کروک آ فرقہ وارانہ بیدادی داسہ ہم برجائِ۔ شار اٹی کرفیو نافذ ئِ و اسکول کالج آتے بند کننگانے۔ بھدرک نا سپرنٹنڈنٹ آف پولیس دلیپ کمار داس پارینے کہ پولیس بیدادی نا واقعہ غاتیٹی اوار 35بندغ ئِ دزگیر کرینے و حالیت آتے کنٹرول کننگ نا کوشست جاری ئِ۔ شاراٹی امن و ایمنی ئِ برقرار تخنگ کن 35 پلاٹون پولیس فورس تعینات کننگانے۔ حساس علاقہ غاتیٹی سلہہ بند پولیس نا دستہ گشت کننگ ئِ۔ ریاست نا ڈائریکٹر جنرل نا بی سنگھ نا پاننگ ئِ کہ حالیت آک قابوٹی ئُ۔
