اسلام آباد۔ 01 نومبر (اے پی پی) وزیراعظم عمران خان زرگزرانی ٹیم ءِ پارت کرینے کہ لس بندغ ءِ ریلیف تننگ کن ہرممکن گام گیج آتیا عملدرآمد ءِ پک کننگے، زرگزرانی شونداری کن اہم میکرواکنامک ٹک آتا سوگوی آ پبی چکار ءِ۔ دوشنبے نادے آ وزیراعظم عمران خان نا کماشی ٹی ملک انا جم زرگزرانی حالیت آتیا جاچ دیوان اس اڈ ہلک۔ دیوان اٹی بنجائی وزیر اقتصادی امور عمرایوب خان، بنجائی وزیر توانائی محمد حماد اظہر، بنجائی وزیر صنعت و پیدوار مخدوم خسروبختیار، بنجائی وزیر حوالکاری و شینکاری چوہدری فواد حسین ، بنجائی وزیر قومی غذائی رکھ سید فخر امام، بنجائی وزیر ڈٹ بندی، شونداری و اصلاحات اسد عمر، سلاہکار واپار عبدالرزاق داؤد، سلاہکار خزانہ شوکت فیاض ترین، وزیراعظم نا خصوصی کمکار ڈاکٹر شہباز گل، گورنر اسٹیٹ بینک ڈاکٹر رضاباقر و بڑزکو کمامدارآک ساڑی ئسر۔ وزیراعظم ءِ زرگزرانی ٹیم انا کنڈآن جہانی مارکیٹ اٹی کبینی و ودوک آ پٹرولیم مصنوعات آتا نہاد آتیا حوال تننگا وخت اس کہ اودے ملک انا جم اقتصادی حالیت آتیا ہم حوال تننگا۔ وزیراعظم عمران خان داوخت آ پارے کہ حکومت کورونا نا دین اتون مون تننگ کن بے مٹ گام گیج کرے، کورونا نا دین و جہانی مارکیٹ اٹی کنوئی آ گڑا و پٹرولیم مصنوعات آتا نہاد آتے ٹی بھاز ترندی اٹ ودکی آن پد ہم حکومت نہاد آتے کم تخنگ کن گام گیج کننگ ءِ۔ وزیراعظم پارے کہ زرگزرانی شونداری کن اہم میکرواکنامک ٹک آتا سوگوی آ پبی چکار ءِ۔ اوزرگزرانی ٹیم ءِ پارت کرے کہ لس بندغ ءِ ریلیف تننگ کن ہرممکن گام گیج آتیا عملدرآمد ءِ پک کننگے۔
