پاکستان آسٹریلیا تون اقتصادی، واپاری، تعلیمی ، دفاعی ، کشاری و سائنس و ٹیکنالوجی نا بشخ آتے ٹی کمکاری ءِ ودفنگ نا خواہندار ءِ، وزیر خارجہ مخدوم شاہ محمود قریشی نا آسٹریلوی ہم منصب ماریس پین تون ٹیل فون آ گپ وتران

اسلام آباد۔ 01 نومبر (اے پی پی) وزیرخارجہ مخدوم شاہ محمود قریشی پارینے کہ پاکستان، آسٹریلیا تون اقتصادی، واپاری، تعلیمی، دفاعی ، کشاری و سائنس و ٹیکنالوجی نا بشخ آتے ٹی ہڑتو م آ کنڈآتا کمکاری ءِ ودفنگ نا خواہندار ءِ، جہانی برادری، اوغان شاری تا زرگزرانی و انسانی بنداو تیا کمکاری کن پبی و گچین گام گیج کرے۔ دوشنبے نادے آ ترجمان دفترخارجہ نا رداٹ وزیرخارجہ شاہ محمود قریشی تون اونا آسٹریلین ہم منصب ماریس پین ٹیل فون آ رابطہ کرے۔ ہڑتوم آ وزیرخارجہ غاتا نیام اٹ ہڑتوم آ کنڈآتا تعلقداری، اوغانستان نا مون آ بروک آ حالیت آتون اوار تین پہ تینی است خواہی نا باندات آ گپ وتران مس۔ وزیرخارجہ پارے کہ پاکستان، آسٹریلیا تون ہڑتوم آ کنڈآتا تعلقداری تے خاص اہمیت ایتک ۔ شاہ محمود قریشی پارے کہ اوغانستان نا خڑک انا ہمسایہ مننگ نا ناطہ، پاکستان، اوغانستان اٹی بدامنی نا سوب آن غٹ آن زیات زہمی مسنے، اوغانستان اٹی چِل سال انا جنگ و جدل آن پد امن نا اومیت ودی مسنے۔ اوپارے کہ اوغانستان اٹی زرگزرانی تنکی نا رداٹ، گرج داہیت انا ءِ کہ جہانی برادری، اوغان شاری تا زرگزرانی و انسانی بنداو تیا کمکاری کن پبی و گچین گام گیج کرے، جہانی برادری ءِاوغانستان نا بابت چیلنج و روشنا گمان تے ہڑتوم آتے مون آ تخسا فیصلہ کروئی مریک۔ وزیرخارجہ آسٹریلوی ہم منصب ءِ کابل آن چندی ملک آتا سفارتی عملہ، جہانی ادارہ غاتا کارندہ و میڈیا نمائندہ غاتا زوت کشنگ نا چرجوئی ٹی برجا پاکستانی کمکاری آن معلومدار کرے و پارے کہ پاکستان 37 ملک آتا 21 ہزار باتی تے اوغانستان آن رکھ کشنگ اٹ کمک فراوان کرے۔ ہڑتوم آ وزیرخارجہ غاتا نیام اٹ تین پہ تینی است خواہی نا کثیر الجہتی بشخ آتے ٹی ہڑتوم آ کنڈآتا کمکاری ءِ مون آ دننگ نا بابت خاص گپ وتران مس۔ وزیرخارجہ پارے کہ آسٹریلیا ٹی رہینگوک آ اسہ لکھ 25 ہزار آن زیات پاکستانی و چندی آسٹریلوی تعلیمی ادارہ غاتے ٹی خوانوک 12 ہزار آن زیات طالب علم، ہڑتوم آ ملک آتا نیام اٹ ہڑتوم آ کنڈآتا تعلقداری تا سوگوی نا درشانی ءِ۔ وزیرخارجہ آسٹریلوی ہم منصب ءِ کورونا دین انا سوب آن آسٹریلیا ٹی خوانوک پاکستانی طالب علم آتے مون تروک سفری مشکل آتیان معلومدار کرسا، ٹریول ایڈوائزری آ نظرثانی نا گرج آ زور شاغا۔ ہڑتوم آ وزیرخارجہ غاک پاکستان و آسٹریلیا نا نیام اٹ ہڑتوم آ کنڈآتا تعلقداری تا ساڑی آ وڑآ است جمی نا درشانی ءِ کرسا، اوفتے پین سوگو کننگ نا عزم انا درشانی ءِ کرے۔ وزیرخارجہ آسٹریلوی وزیرخارجہ ءِ دورہ پاکستان نا سلہ خلک ہرادے او منت واری اتون امنا کرے۔