اسلام آباد۔ 01 نومبر (اے پی پی) سلاہکار خزانہ شوکت ترین پارینے کہ آئی ایم ایف تون باندات آک طے مسنو، حکومت بدلی، اصلاحات و احتساب نا نعرہ ءِ اتسا بسنے، حکومت ادارہ جاتی اصلاحات کن اہم گام گیج کرینے، سنگل ونڈو نا بناءِ کننگ اصلاحات نا کنڈآ اہم ءُ گام اسے۔ داخیال آتا درشانی ءِ او دوشنبے نادے آ پاکستان سنگل ونڈو لانچنگ دود آن تران کرسا کرے۔ سلاہکار خزانہ پارے کہ سنگل ونڈو نا بناءِ کننگ اصلاحات نا کنڈآ اہم ءُ گام اسے، سنگل ونڈو آن واپار ءِمون آ دننگ دوئی مریک۔ اوپارے کہ حکومت بدلی ، اصلاحات و احتساب نا نعرہ ءِ اتسا بسنے، دا ادارہ جاتی اصلاحات کن اہم گام گیج کرینے، پاکستان کسٹمز ءِ سنگل ونڈو نا لانچنگ آ مبارکبادی ایتیوہ۔ اوپارے کہ تدوک آ اِراسال اٹی کورونا دین انا سوب آن سپلائی چین زہمی مس۔ داسہ زرگزران بحالی نا کنڈآ ہِننگ ءِ، کاروباری بندغ آک غٹ وارخواہی تیان فائدہ ہرفنگ کن تیار ءُ، پاکستان سنگل ونڈوآن ملکی برآمد آتے ٹی ودکی مریک، علاقائی واپار و جیواکنامک رابطہ غاتے ٹی گچینی بریک۔ اوپارے کہ آئی ایم ایف تون باندات آک طے مسنو، آئی ایم ایف تون معاہدہ ہنداہفتہ ٹی مریک، شوکت ترین پارے کہ اسٹیٹ بینک انا بابت کانود کن آئینی ترمیم آتا گرج ءِ، آئینی ترمیم کن نن تون اِراتہائی گیشتری اف، آئی ایم ایف ءِ ہنداہیت ءِ سرپند کننگ نا کوشست کرینن۔ گڑاس بینک آتا خذمت آتے ٹی تعطل نا بابت سوج انا ورندی ٹی اوپارے کہ سرکاری ملازم آتا تنخواک لیٹ مفسہ، حالیت آتا مون ءِ توننگانے۔ اوپارے کہ کبینی مچ آ دنیاٹی ودانے، ٹارگٹڈ سبسڈی نا فراوانی آ زوت عمل بناکیک۔
