اسلام آباد۔ 01 نومبر (اے پی پی) پبلک اکاؤنٹس کمیٹی نا ذیلی کمیٹی نا دیوان دوشنبے نادے آ پارلیمنٹ ہاؤس اٹی کمیٹی نا کنوینرشاہدہ اخترعلی ناکماشی ٹی مس۔ دیوان اٹی پی اے سی نا باسک نور عالم خان، شیخ روحیل اصغر، ملک عامر ڈوگر و منزہ حسن تون اوار تعلقدار سرکاری ادارہ غاتا آفیسر آک ساڑی ئسر۔ دیوان اٹی وزارت جان جوڑی نا 2016-17نا آڈٹ اعتراض آتا جاچ ءِ ہلنگا۔ شیخ روحیل اصغر وزارت جان جوڑی نا مالیاتی نظم ونسق نا بابت گڑتی نا درشانی ءِ کرے و پارے کہ اگہ وزارت آڈٹ اتون اواری اٹ دابانداتءِ سرتسکہ تو دا باندات داڑے پیش متوکہ۔ شاہدہ اخترعلی پارے کہ وزارت جان جوڑی و پولی کلینک نا بابت مرکزی پی اے سی ہم ناراضگی نا درشانی ءِ کرینے۔ ایڈیشنل سیکرٹری جان جوڑی پارے کہ نن منہ تُو آن بھاز کوشست آتے اٹ ریکارڈ نا چھان بین کرینن۔ صوبہ غاتے جان جوڑی نا بشخ ءِ گدریفنگ آن پد اوفتا ریکارڈ اسکان رسینگ مشکل مسنے۔ دابابت صوبائی آڈٹ کمامدارآتے متحرک کننگ مریک۔ پی اے سی پارے کہ نن صوبہ غاتیان ہریفنگ کپنہ۔ صوبہ غاتے زروزارت جان جوڑی گدریفک۔ شاہدہ اخترعلی پارے کہ صوبہ غاتا اڈٹ نا تینا نظام اسے۔ آڈٹ کمامدارآک پاریر کہ صوبہ غاتے تروک آ فنڈ آتا زموار بنجائی وزارت جان جوڑی ءِ۔ ایڈیشنل سیکرٹری جان جوڑی پارے کہ ننے اِرٹ آن مسہ تُو انا وخت تننگے تانکہ نن تینا کاریم ءِ پورو کننگ کین۔ آڈٹ کمامدارآک پاریر کہ داننے اکاؤنٹس ایترہ تو نن کاریم کننگ کینہ۔ شیخ روحیل اصغر پارے کہ اگہ اوفک اکاؤنٹس تتوس تو ولدا نن تینا کسر ءِ اختیار کینہ۔ نورعالم خان پارے کہ اوجنوری ٹی مسہ تُو انا وخت خواہسوسس ولے داسہ 9 تُو گدرینگ انگ آن پد ہم اوآڈٹ ءِ ریکارڈ فراوان کتنے۔ وزارت جان جوڑی نا کنڈآن پاننگاکہ نن کرنٹ سائیڈ آ کاریم ءِ پورو کرینن، ڈویلپمنٹ سائیڈ کن صوبہ غاتیان ریکارڈ ہلسا فراوان کینہ۔ پی اے سی وزارت جان جوڑی نا خواست آ اِراتُو انا وخت ترسا پارت کرے کہ اِراتُواٹی ہم اگہ آڈٹ ءِ حسابات نا فراوانی متو تو ولدا پی اے سی سخت لائحہ عمل اس اختیار کیک۔
