بیجنگ۔ 01 نومبر (اے پی پی) بیجنگ اٹی پاکستانی سفارت خانہ ٹی فوڈ اینڈ کلچرل فیسٹیول اس اڈتننگا ہرانا مسخت پاکستان نا دودوربیدگ ءِ داکُن و خور، رنگ رنگی آ دستکاری و لوک ساز و زیمل ءِ گچین وڑاٹ پیش کننگ ئس۔ فوڈ اینڈ کلچرل فیسٹیول اٹی چین اٹی پاکستان نا سفیر معین الحق و میڈم فرح معین شرفمند آ مہمان تے بخیر کریر۔ نمائش اٹی پاکستان نا زیبا انگا ندارہ، مخلوق، تاریخی یات گار و پبی دودوربیدگی میرات نا رداٹ گڑاتے تخنگاسس۔ پاکستان اٹی چین نا مسکوہی سفیر لوشولن اے پی پی ءِ پارے کہ چین نا دارالحکومت اٹی سیل ءِ جوان ءُ موسم اس تکنگک و دادود ہڑتوم آ ملک آتا الس نا نیام اٹ ہرموسم نا سنگتی ءِ پین سوگو کننگ اٹ اہم ءُ کڑد اس ادا کیک۔ پاکستانی سکالر، اردوادب نا ادیب و شاعر انتخاب عالم ہم دادود اٹی بشخ ہلکر و پاکستانی دودوربیدگ، کن و خور و پاکستانی مہمانداری نا پبی ستاءِ کرے۔ پاکستانی سفارت خانہ نا کنڈآن دادود انا اڈتننگ ہڑتوم آ ملک آتا نیام اٹ سفارتی تعلقداری تا قیام نا 70 سال پورو مننگ نا وخت آ کننگا ہرانا مسخت السی کہول آ رابطہ و دودوربیدگی افہام و تفہیم ءِ مون آ دننگ ئس۔ دود اٹی چندی زند انا بشخ آتیان تعلق تخوک آ چینی مہمان، سفارتکار، پاکستانی کمیونٹی نا باسک و میڈیا نا نمائندہ غاتا بھلو کچ اس بشخ ہلکر۔
