اسلام آباد۔ 29 اکتوبر (اے پی پی) پاکستان بھارتی شار تریپورہ ٹی انتہاپسند ہندوتا کنڈآن مسلمان تا چندی مسیت، اُرا و دوکان تا پرغنگ نا ترندی اٹ مذمت ءِ کرینے۔ جمعہ نادے آ ترجمان دفترخارجہ بھارتی شار تریپورہ ٹی مسیت آتا بے حرمتی و مسلمان تا ملکیت آتا پرغنگ آ سخت ردعمل نا درشانی ءِ کرسا پارینے کہ دا جلہو آک تدوک آ ہفتہ غان برجاءُ وخت اس کہ ریاستی مشینری نئے بیرہ مسلمان و اوفتا ملکیت آتا رکھ اٹ بے سہب مسنے بلکن ہندی مسلم تنظیم تے کمک فراوان کننگ اٹ ہم غیرزموار مسنے۔ ترجمان پارے کہ بی جے پی۔ آرایس ایس گٹھ جوڑ نا رداٹ ہندو توا نا ریکارڈ 2002 ٹی گجرات آن ہلیس 2020اٹی نئی دہلی اسکان مسلمان تا کشت وخون و منظم انسانی حق آتا خلاف ورزی تیان پُرتموک ءِ۔ اینو نا ہندوستان اٹی اقلیت آتے کن بھاز کم ءُ جاگہ اسے ، ہرامذمت نا قابل ءِ۔ ترجمان پارے کہ داہم ہموخس قابل مذمت ءِ کہ آسام اٹی مسلمان تا اوفتا دہائی تیا متکن آ اُراتیان ٹارگٹڈ و ظالمانہ بے دخلی نا چرجوئی برجاءِ۔ پاکستان جہانی برادری آن خواست کرینے کہ او اسلاموفوبیا نا ودوک آ ریسہ و بھارت اٹی اقلیت خاص وڑاٹ مسلمان تا برخلاف جلہو آتے توننگ کن تینا کڑد ءِ ادا کے و اوفتا رکھ، سلامتی و راجی آسراتی و اوفتا عبادت گاہ و دودوربیدگی میرات آتا ہند آتا رکھ ءِ پک کے۔
