اسلام آباد۔ 29 اکتوبر (اے پی پی) بنجائی وزیر داخلہ شیخ رشید احمد پارینے کہ حکومت نا رٹ ءِ ہرحال اٹ برجاتخنگک، کالعدم تنظیم تون مذاکرات بھرمی مننگ کتو، حکومت تینا قول آتیا سلوک ءِ، مارچ انا منتظمین آک تینا مرکز آ پدی ہِننگ نا قول ءِ پورو کیر، پنجاب اٹی پولیس ءِ رینجرنا ماتحت کرینن و انسداد دہشت گردی ایکٹ نار داٹ رینجرءِ غٹ واکداری دوئی ءِ، حالیت آتیا وزیراعظم قوم ءِ پت اٹ ہلیک، ایف آئی اے ءِ سوشل میڈیا غا اعتراض نا قابل مواد آتا برخلاف کارروائی نا پارت کرینن ۔ جمعہ نادے آ وزیراعظم نا کماشی ٹی قومی سلامتی کمیٹی نا دیوان آن پد پریس کانفرنس آن تران کرسا وزیرداخلہ شیخ رشید احمد پارے کہ کمیٹی نا دیوان 2 گھنٹہ اسکان برجائس ہراٹی امن و ایمنی نا حالیت آتیا سرجمی اٹ سجفنگا۔ دیوان اٹی کنے آن بیدس بنجائی وزیر حوالکاری و شینکاری چوہدری فواد حسین ، وزیردفاع پرویز خٹک، بنجائی وزیر مذہبی امور نورالحق قادری، چیئرمین جوائنٹ چیفس آف اسٹاف کمیٹی و آرمی چیف آن بیدس سلہہ بند فوج انا سروک آک بشخ ہلکر۔ دیوان اٹی فیصلہ کننگاکہ حکومت نا رٹ و امن و ایمنی ءِ ہرحال اٹ برقرار تخنگک۔ وزیر داخلہ پارے کہ او اومیت کیک کہ مذاکرات دُوارہ مریک ہراٹی حکومت نا نمائندگی ءِ نورالحق قادری کیک۔ اوپارے کہ درو آرٹیکل 147 نا رداٹ پنجاب پولیس ءِ رینجرز نا ماتحت کننگانے، پنجاب حکومت اوفتے گرج انا رداٹ ہرجاگہ غا کاریم اٹ اتنگ کیک، ننا کوشست ءِ کہ باندات افہام و تفہیم اٹ ایسر مریر، جی ٹی روڈ آ 12 ربیع الاول آن ہلیس داتم اسکان مروک آ دھرنہ و مارچ آن الس زہمی مننگءِ، داوخت آ ہلہلہ تیٹی 4 پولیس کارندہ شہید و 80 آن زیات سم لگنگ آن ٹھپی مسنو ہرافتیان 6 آن 8 انا حالیت نازرک ءِ۔ وزیرداخلہ پارے کہ لٹ بردارپولیس کارندہ غاتیا سم چلیفنگا، داحالیت آتے ٹی حکومت پولیس ءِ رینجرز نا ماتحت کننگ نا فیصلہ کرین۔ اوپارے کہ ای مذاکرات آن پد ہرامعاہدہ غا دستخط کریسٹ حکومت اوڑآ سلوک ءِ ولے جی ٹی روڈ ءِ ملنگ و مرکز آ پدی ہِننگ نا ہرا قول ءِ ایلو فریق کریسس اودے پورو کننگتو۔ اگہ مذاکرات نتیجہ سے آ سرمس تو قوم ءِ پت اٹ ہلنگک، وزیراعظم عمران خان قوم ءِ حالیت آتیان معلومدار کیک۔ اسہ سوج اسے نا ورندی ٹی اوپارے کہ حالیت آتا بابت بھارت، ہانگ کانگ، سویلی کوریا، سویلی افریقہ، امریکہ و برطانیہ تون اوار چندی ملک آتیان وٹس ایپ و سوشل میڈیا غا مواد اپ لوڈ کننگ انگ ءِ، پاکستان آن ہرافک داکارروائی ٹی اوار ءُ اوفتا برخلاف ایف آئی اے ءِ کارروائی نا پارت کرینن۔ اسہ سوج اسے ٹی وزیر داخلہ پارے کہ داحالیت آتیان دنیا ٹی پاکستان آ ملنڈ خلنگ انگ ءِ ، ای اومیت کیوہ کہ قومی نسخان مف، پولیس نا جونک ہم نہادی ءُ، سعد رضوی تون گپ وتران مننگ ءِ ، لاہور اٹی ہم اوڑتون مذاکرات مسوسس ولے مذاکرات داسکان بھرمی مننگ کتنے۔ اسہ سوج اسے نا ورندی ٹی اوپارے کہ داہفت می وار مارچ اکن پیش تمانو، الس ءِ داحالیت آتیان بھلو تکلیف اس مون تروک ءِ ، رینجرءِ کانود نافذ کننگ کن غٹ واکداری دوئی ءِ، اومیت کینہ کہ مذاکرات اٹ ویل انا ایسر اس پیش تمک۔
