اسلام آباد۔ 29 اکتوبر (اے پی پی) ایوان صدر نا جامع مسجد آن نماز جمعہ و خطبہ ءِ براہ راست نشر کننگا۔ صدر مملکت ڈاکٹر عارف علوی، اسلامی نظریاتی کونسل نا چیئرمین ڈاکٹر قبلہ ایاز و ایوان صدر نا کمامدار و عملہ جمعہ نا نماز ءِ خوانار۔ داوخت آ اسلامی نظریاتی کونسل نا چیئرمین ڈاکٹر قبلہ ایاز خطبہ تس۔ اوتینا خطبہ ٹی پارے کہ ربیع الاول نا مقدس تُو انا خواست ءِ کہ خواجہ محمد صلی اللہ علیہ و آلہ وسلم و اونا حیات طیبہ نا عملی سبخ آتیان راہشونی دوئی کرسا تینا دامون ایمون نا مخلوق نا تربیت نا بست وبند ءِ کننگے۔ اوپارے کہ خواجہ محمد صلی اللہ علیہ و آلہ وسلم نا سیرت طیبہ ننکن کسرنا ڈیواءِ، مسلمان تیکن المی ءِ کہ او کس اسے کن تکلیف نا سوب مفس ۔ اوراج اٹی خار آ مبنی رویہ غاتیان پاریز کننگ آ زور شاغسا پارے کہ نن غٹ اللہ نا مخلوق تون احسان و حسن سلوک اٹ پیش برین۔ ننا خواجہ محمد صلی اللہ علیہ و آلہ وسلم کسر نا اڑاند آتے مر کننگ و مخلوق کن آسانی ودی کننگ نا تلقین کرے۔ داوخت آ ملک و قوم انا سلامتی ، شونداری و شونہالی کن دعا کننگا۔ یات سلے کہ صدر مملکت ڈاکٹر عارف علوی نا پارت آ مخلوق نا راہشونی کن ایوان صدر نا جامع مسجد آن خطبہ جمعہ ءِ براہ راست نشر کننگ نا چرجوئی نا بناءِ کننگانے۔