اسلام آباد۔ 29 اکتوبر (اے پی پی) صدر مملکت ڈاکٹر عارف علوی بنجائی محتسب نا فیصلہ نا برخلاف لاہور الیکٹرک سپلائی کمپنی (لیسکو)نا درخواست ءِ مسترد کرسا جنوزان ءِ پینشن نا زرتس نا پرمان ءِ برقرار تخسا لیسکو ءِ پارت کرینے کہ بنجائی محتسب نا فیصلہ نا رداٹ جنوزان ءِ اونا رواپنشن نا پورو بشخ ءِ تننگے، صدر مملکت حکومتی پالیسی نا رداٹ الاؤنسز اتون جنوزان ءِ پنشن نا زرتفننگ آ ترندی نا درشانی ءِ کرے و تینا فیصلہ ٹی گونداکہ بقیہ پنشن آ حکومتی پالیسی نا رداٹ اَرے نا ریٹائرمنٹ نا تاریخ آن ودکی ہم ادا کننگے۔ ایوان صدر نا میڈیا ونگ انا رداٹ غاو کروک مختار بیگم نا ایماندار اَرے ہراکہ لیسکوٹی ملازم ئس اپریل 2005 اٹی ریٹائرمس و دسمبر 2013 ٹی کزیت کرے، غاو کروک ءِ اَرے نا کزیت آن پد فیملی پنشن باقاعدگی اٹ تننگا ولے کم کچ آتیا تننگا۔ غاو کروک پارے کہ او 21،928 روپئی ماہانہ پنشن دوئی کننگ ءِ وخت ا س کہ حکومت نا کنڈآن وقتا فوقتا کروک آ غٹ انکریمنٹ ءِ اوار کرسا اودے 15 سال آن پد کم و ود اِراہنداخہ بایدے مریر۔ غاو کروک تینا غاو انا ازالہ کن بنجائی محتسب تون رابطہ کرے۔ بنجائی محتسب مورخہ 09-03-2021نا تینا پرمانہ نامہ ٹی پارے کہ دانا انصافی اسے کہ واپڈا پنشن ڈائریکٹوریٹ حکومتی پالیسی آ پورو وڑٹ عمل کتو و جنوزان ءِ بحالی آ ودفوک آ تدوک آ ودکی تننگتو، وخت اس کہ ڈائریکٹر (پنشن) واپڈا تینٹ غٹ ڈسکوز، جینکوز این ٹی ڈی سی ءِ SOP-2002نا رداٹ پنشن نا بحال مروک بشخ آ غٹ پنشنر آتے گدرینگوک آ تاریخ آتیان ودکی نا موکل تننگ نا پارت جاری کریسس۔ پین دا کہ متوفی پنشنر آتا جنوزان آتے داآسراتی آن خاص وڑاٹ توننگتو۔ ہنداخاطرآن لیسکو نا کنڈآن بدانتظامی پک مسنے۔ بنجائی محتسب تینا فیصلہ ٹی مستی پارے کہ حکومت پاکستان نا پالیسی نا رداٹ ریٹائرڈ/کزیت کروک ملازم آتے ریٹائرمنٹ نا تاریخ آن پنشن نا بحال مروک بشخ اٹی ودکی نا موکل تننگ آن پد کموٹڈ بشخ آ بحالی نا موکل تسنے۔ ہنداوڑ اکاؤنٹنٹ جنرل آف پاکستان ریونیو، لاہور و اے جی پی آر اسلام آباد داپالیسی فیڈرل سروسز ٹربیونل نا مورخہ 05-01-2012نا فیصلہ ءِ مون آ تخسا تینا کریسس، ہرادے سپریم کورٹ آف پاکستان 24-04-2012آ تینا فیصلہ نا کمک اٹ برقرار تخاسس کہ پنشنرآتا خاہوت ہم پنشن نا بحال مروک بشخ آ وقتا فوقتا کروک آ ودکی نا حقدار ءُ۔
