کوئٹہ۔29اکتوبر (اے پی پی): پیسریگیں سپیکر بلوچستان اسمبلی میر عبدالقدوس بزانجو بلا مقابلہ سر وزیر بلوچستان گچین کنگ بوتگ۔ آدینگ ءِ روچ ءَ ڈپٹی سپیکر سردار بابر خان موسی خیل ءِ سروکی ءَ بوھوکیں صوبائی اسمبلی ءِ دیوان ءَ 65 ءَ چہ 39 باسک ساڑی اتنت ءُ اے توامیں باسک آں عبدالقدوس بزنجو ءِ ھک ءَ ووٹ دات۔ نوک گچین بوتگیں سرو زیر بلوچستان میر عبدالقدوس بزنجو ءِ سیادی گوں بلوچستان ءِ دمگ آواران ءَ چہ انت۔ آ ضلع آواران ءِ دمگ جھاؤ ءِ نامداریں سیاسی ءُ چاگردی سروک میر عبدالمجید بزنجو ءِ گس ءَ ودی بوتگ۔ آئی ءَ بنداتی زانشت جھاؤ ءَ وتی کوچگ شنڈی ءِ سرکاری سکول ءَ چہ در جتگ وھدیکہ میٹرک ءُ ایف ایس سی ءِ وانگ ءُ زانگ کوئٹہ ءِ جتا جتائیں زانشتی ادارگ آں چہ سرجم کت۔ یونیورسٹی آف بلوچستان ءَ چہ گریجویشن ءَ چہ پد آئی ءَ نمل یونیورسٹی اسلام آباد ءَ چہ انگلش لینگویج ءَ ڈپلومہ کتگ۔ عبدالقددوس بزنجو ءَ سیاست ءِ بندات پیسریگیں صدر جنرل پرویز مشرف ءِ دور ءُ باریگ ءَ چہ بلدیاتی گچین کاری ءَ کتگ بلے یک ووٹ ءِ سبب ءَ آ ضلعی ناظم جوڑ بوت نہ کت۔ مرچی بلوچستان اسمبلی ءَ میر عبدالقدوس بزنجو 39 ووٹ گران ءَ دومی رند ءَ سر وزیر بلوچستان گچین بوتگ سر وزیر بلوچستان ءِ اے گچین کاری ءَ میر عبدالقدوس بزنجو ایوکیں امیت وار بوتگ اسمبلی دیوان ءَ بی این پی، جے یو آئی ، پشتونخوامیپ ءِ باسک ءُ آزات باسک نواب اسلم رئیسانی ءَ بھر زوری نہ کت وھدیکہ نواب ثناء اللہ زہری ءَ میر عبدالقدوس بزنجو ءَ را ووٹ دات ایشی ءَ چہ پیسر 2018 ءَ ھم میر عبدالقدوس بزنجو 39 ووٹ گران ءَ سر وزیر گچین بوتگ ات۔
