بیجنگ۔ 28 اکتوبر (اے پی پی) چین اٹی پاکستان نا سفیر معین الحق جموں و کشمیر نا الس نا بھارت نا غیر کانودی کوزہ نا برخلاف و آجوئی نا جہد ءِ خراج تحسین پیش کرسا پارے کہ بے گناہ و کودک کشمیری تیا بھارتی فوج انا چٹپروک آ ظلم آن پد ہم اوکشمیری تا جہد آجوئی نا دوئی کننگ نا عزم ءِ پرغنگ و کشمیر نا ویل ءِ ایسر کننگ نا کوشست آتے توننگ اٹ بے سہب مسنے۔ اوپنچ شنبے نادے آ پاکستانی سفارت خانہ ٹی کشمیر تہاردے انا چرجوئی ٹی اڈ ہلوک آ خصوصی دود اٹی تران کرسا پارے کہ بھارتی کوزہ گیر کمامدارآتا 5 اگست 2019 نا غیرکانودی و اسہ کنڈی گام گیج آتیان پد مقبوضہ کشمیر اٹی خاص وڑاٹ بھارتی جور، جارحیت وظلم پین ترند و خوفناک حداسکان سرمسنے 5 اگست نا غیرکانودی گام گیج آتیان پد آن بھارت نا غیر کانودی کوزہ گیری ٹی جموں و کشمیر نا مچ آ علاقہ گھیڑاٹی ءِ، کشمیری سرکڑدہ غاک بندی ءُ و اوفتا ورناتے سرچ آپریشن تیٹی شست کننگ انگ ءِ۔ جموں و کشمیر دنیا نا او اسٹ انگا علاقہ جوڑ مسنے ہراڑے غٹ آن زیات کچ اٹ فوج تعینات کننگانے اوکان پد ہم بھارت آن آجوئی کن کشمیری تا بدل مفروک جہد برجاءِ۔ داوخت آ پاکستان نا وزیراعظم عمران خان و صدر ڈاکٹر عارف علوی ناکلہو آتے خوانسا بنفے۔ بسلسلہ کشمیر تہاردے انا دود اٹی کشمیری تا جہدِ آجوئی و بھارتی کوزہ گیر فوج انا ظلم آ عکسی نمائش ہم اڈ ہلک۔ پاکستانی ایمبیسی کالج نا طالب علم آک خصوصی پرفارمنس نا کمک اٹ جموں و کشمیر نا الس نا حالیت ءِ مون آتخا اوکان پد کشمیر اٹی بھارتی انسانی حق انا خلاف ورزی تیا خصوصی دستاویزی فلم اس ہم نشان تننگا۔ 27 اکتوبر 1947 آ بھارتی فوج غیر کانودی وڑاٹ جموںو کشمیر اٹ پترینگا و دادے آ غیرکانودی بھارتی کوزہ نا تہارانگا دے بناکریسس ہرااینو اسکان برجاءِ۔
