اسلام آباد۔ 28 اکتوبر (اے پی پی) میراپاکستان میراگھر اسکیم نا رداٹ 200 ارب آن زیات نا فنانسنگ نا درخواست دوئی مسنے۔ اسٹیٹ بینک آف پاکستان آن جاری اعلامیہ نا رداٹ دا اسکیم نا رداٹ اولیکو وار اُرانا خواجہ جوڑ مروک آتے کن کم خڑچ ہند آتا وام تیٹی بینکاری نا صنعت ءِ سوگوی ملانے۔ بینک آک 78 ارب روپئی نا فنانسنگ نا منظوری ءِ تسنو ہرافتیان 18 ارب روپئی جاری کننگانے۔ اسٹیٹ بینک اومیت ظاہر کرینے کہ تعلقدار فریق آتا اسیجائی کوشست آتے اٹ پاکستانی تا جند انا کاٹم آ چھت انا تغ پورو مننگ کیک۔ میراپاکستان میرا گھر اسکیم نا پن اٹ پنی ہند آتا وام تا بابت حکومت نا مارک اپ زراعانت اسکیم اسکان الس نا بھلا بشخ انا رسینگ ءِ ودفے۔ تدوک آ سال میرا پاکستان میراگھر اسکیم نا سفر بناکریسس اووخت آ کم خڑچ ہند آتا وامک کم و ود مفننگ نا بریبر ئسر انتئے کہ کمرشل بینک آک دا بشخ انا داخلی خطرہ غاتا خوف آن وخت اس ہم اوفتے ٹی ودکی نا کوشست کتوس ولے ملک اٹی ہند و تعمیراتی سرجزآتے مون آ دننگ نا سوگو حکومتی و خاص وڑاٹ این اے پی ایچ ڈی اے ، اسٹیٹ بینک و ایلو فریق آتا عزم انا نتیجہ ہاؤسنگ و تعمیرات نا وام تیٹی خاص ودکی نا دروشم اٹ پیش تمنگ بناکرینے۔ ہندی و تعمیراتی بشخ آتے وام تیٹی ودکی داہیت انا ڈیک ایتک کہ بینک آک تینا ادارہ جاتی سمت/اسٹریٹجک فوکس ہند و تعمیرات نا شونداری نا کنڈآن کرینے۔ ساڑی آ تُوتیٹی بینک آک تینا سسٹم و وڑوڈول ءِ اول سرآن ٹہیفینو ہراٹی ٹیکنالوجی نا پلیٹ فارم نا اپ گریڈیشن و تینا کارندہ غاتا تربیت نا فراوانی اوار ءِ۔
