اسلام آباد۔ 28 اکتوبر (اے پی پی) پاکستان نا قومی زرگزران داوخت آ زیات ودکی نا کنڈآ ہِننگ ءِ ، ملکی تہہ نا پیدوار اٹ وسعت مریس میعاد و پائیدار اقتصادی ودکی کن المی ءِ ، ویلیو ایڈڈ پیدوار اٹ ودکی زیات منافع کٹیا کننگ نا سوب مریک ہراڑآن کھپت و زرکاری آ زیات مصارف نا گنجائشت ودی مریک، برجامالی سال انا اولیکو مسہ تُو اٹی ترسیلات زر، برآمدات و ایف بی آر نا کٹیا ٹی نمان ودکی ریکارڈ کننگانے۔ داہیت ءِ وزارت خزانہ نا کنڈآن جاری کروک ماہانہ اقتصادی اپ ڈیٹ اٹی پاننگانے۔ وزارت خزانہ نا رداٹ پائیدار ودیکی نا کنڈآ دننگ کن المی ءِ کہ ویلیو ایڈیشن نا زیات تر بشخ کھپت نا جاگہ غاسرمایہ نا زیات پیدوار نا کنڈآ دننگے۔ داحالیت آتے مریس میعاد پنجرجاتی پالیسی تا کمک اٹ قابوٹی تخنگ مریک وساڑی حکومت داکنڈآ ہِننگ ءِ۔ برجامالی سال انا اولیکو مسہ تُو اٹی ترسیلات زر اٹی 12.5 درسد نا ودکی ریکارڈ کننگانے۔ تدوک آ سال جولائی آن ستمبر اٹ ترسیلات زر انا کچ 7.1 ڈالر ریکارڈ کننگاسس ہرا برجامالی سال انا اولیکو مسہ تُواٹی 8 ارب ڈالر اسکان سرمس۔ برجا مالی سال انا اولیکو 3 تُو اٹی ملکی برآمد آتے ٹی 35.2 درسد نا ودکی مسنے، دامد اٹی برآمد آتا کچ 7.2 ارب ڈالر ریکارڈ کننگا ہراتدوک آ سال انا ہندا مد اٹی 5.2 ارب ڈالر ئسر۔ داڑتون اوار اوار ملکی درآمد آتے ٹی 64.3 درسد نا ودکی مسنے، ساڑی آ مالی سال انا اولیکو مسہ تُواٹی 17.5 ارب ڈالر نا درآمد ریکارڈ کننگانے ہراتدوک آ سال 10.13 ارب ڈالر ئسر۔ حسابات جاریہ نا نسخان ڈالر نا لحاظ اٹ تدوک آ سال انا اولیکو مسہ تُو انا منفی 0.9 درسد آن ودسا برجامالی سال انا اولیکو مسہ تُو 3.4 ارب ڈالر ریکارڈ کننگا۔ جی ڈی پی نا کچ آن حسابات جاریہ نا نسخان 4.1 ارب ڈالر ریکارڈ کننگا ہراتدوک آ سال انا ہند امد اٹی منفی 1.2 ارب ڈالر ئسر۔ براہ راست درملکی زرکاری ٹی برجامالی سال انا اولیکو مسہ تُواٹی 4 درسد نا کمتی ریکارڈ کننگا۔ تدوک آ مالی سال انا اولیکو 3 تُو اٹی 457.6 ملین ڈالر نا براہ راست زرکاری ریکارڈ کننگاسس ہرابرجامالی سال اٹ کم مرسا 439.1 ملین ڈالر مس۔پورٹ فولیو زرکاری ٹی برجامالی سال اٹی ودکی مون آ بسنے۔ دامداٹی پورٹ فولیو زرکاری نا کچ 979.8 ملین ڈالر ریکارڈ کننگا ہرا تدوک آ مالی سال انا ہند امد اٹی منفی 37.4 ملین ڈالر ریکارڈ کننگاسس۔ جم درملکی زرکاری نا کچ 1318.6 ملین ڈالر ئس ہراتدوک آ مالی سال انا ہندا مد اٹی 311.6 ملین ڈالر ئس۔ وزارت خزانہ نا رداٹ 21 اکتوبر 2021آ ملکی زرمبادلہ نا کوڑی نا کچ 24.07 ارب ڈالر ریکارڈ کننگا ہرا تدوک آ سال انا ہندا مد اٹی 19.32 ملین ڈالر ئس۔ 21 اکتوبر آ ایکس چینج ریٹ 173.96 روپئی ئس۔ تدوک آ سال 21 اکتوبر آ ایکس چینج ریٹ 162.13 روپئی ئس۔ وزارت خزانہ نا رداٹ مالی سال انا اولیکو مسہ تُو اٹی ایف بی آر نا کٹیا تیٹی 38.2 درسد نا ودکی ریکارڈ کننگانے۔ جولائی آن ستمبر اٹ ایف بی آر 1396 ارب روپئی نا کٹیا یکجاکرے ہرا تدوک آ سال ہندا مد اٹی 1010 ارب روپئی ئسر۔
