پاکستان امن تون سلوک ءِ و سلک، چارٹرآف اکانومی اتون چارٹرآف سیکورٹی آ ہم بایدے ہیت مرے، وزیراعظم نا سلاہکار قومی سلامتی ڈاکٹر معید یوسف نا کانفرنس آن تران

اسلام آباد۔ 28 اکتوبر (اے پی پی) وزیراعظم نا سلاہکار قومی سلامتی ڈاکٹر معید یوسف پارینے کہ پاکستان امن تون سلوک ءِ و سلک، ننے پاکستان نا بیانیہ ءِ سوگو و گچین وڑاٹ تالان کننگ نا تدابیر کروئی مریک، چارٹرآف اکانومی اتون چارٹرآف سیکورٹی آہم بایدے ہیت مرے۔ پنچ شنبے نادے آ داڑے پاکستان نا قومی بیانیہ نا بابت اڈ ہلوک آ کانفرنس آن تران کرسا اوپارے کہ قومی بیانیہ ءِ دنیا نا مون آ تخنگ کن میڈیا نا پوسکنی اتون چلینگوئی مریک، اسہ بیانیہ ءِ ہرجاگہ غا اسہ ہی وڑاٹ تکنگ مفک ، چندی بیانیہ غاک ملسا پارہ کہ پاکستان امر ءُ ملک اسے۔ معید یوسف پارے کہ 20 سال آن دیکی ٹی پاکستان نا بارواٹ منفی تاثر ودی کننگا ولے پاکستان امن تون سلوک ءِ و سلک۔ اوپارے کہ پاکستان راستکی تیا مبنی قومی بیانیہ غا یخین تخک ولے نن بایدے سجفن کہ ننا ہیت ءِ زیات امر بِننگک، قومی بیانیہ ءِ دنیا نا مون آ تخنگ کن میڈیا نا پوسکنی اتون اوار چلینگوئی مریک۔ اوپارے کہ تینا موقف ءِ بیان کننگ اٹ ننارویہ معذرت خواہانہ بایدے مف، نن پاش بایدے ہیت کین کہ ننکن سٹریٹجک گچینی ہراباندات اٹی ءِ، دنیا ءِ پاننگ کن پاکستان تون مثبت و حقیقت آ مبنی سرسہبی ارے۔ معید یوسف پارے کہ نن ایلو ملک آتون اسٹریٹجک کمیونیکیشن اٹ پدی اُن، ننے رابطہ کاری و شونداری شریداری آ چکار ءِ ودفنگ نا گرج ءِ۔ اومستی پارے کہ پاکستان اٹ چارٹرآف اکانومی اتون چارٹر آف سیکورٹی آ ہم بایدے ہیت مرے، بطور مسلم ریاست ، سیوت، انسانی آسودہی، امن و ملکی فائدہ غاتیا قومی ڈائیلاگ کننگ نا گرج ءِ۔