اسلام آباد۔26اکتوبر (اے پی پی): مزن وزیر عمران خان ءَ چین ءِصدر شی جن پنگ ءَ گوں ٹیلی فون ءِ سرءَ گپ ء ُتران کتگءُ کمیونسٹ پارٹی ءِ 100 می ودی روچء ُ چینی اُلس ءِ پہ نیزگاری ءِ ہلاسی ءِ ھاترءَ بے مٹیں سوبمندی ءِ سرءَ مراد بات داتگ، دوئیں راہشوناں دوئیں ہمسائگیں ملک آنی نیام ءَ سیادی ءَ را گیش محکم کنگ ءِ سرءَ تپا کتگ۔ سے شمبے ءِ روچءَ مزن وزیر کارگس ءَ چہ جاری بیان ءِردءَ مزن وزیر ءَ کمیونسٹ پارٹی ءِ سد سالانی تہا چین ءَ را نیزگاری ءَ چہ درکنگ ءَ ءُ دیمروئی ءِ نیمگءَ رہادگ کنگ ءَ مراد بات داتگ۔ دوئیں راہشوناں سفارتی سیادی ءِ 70 سال سرجم بوہگءَ یکے دومی ءَ را مراد بات داتگ۔ اے موہ ءَ دمگی ء ُ میاں اوستمانی پڑ ءِ سرءَ ھیال ء ُلیکہ ءِ درشانی کنگ بوتگ۔ مزن وزیر ءَ کورونا وائرس ءِ ہوپ ءَ را گرء ُدار کنگ ءَ چین ءِ گامگیجانی پدءَ پاکستان ءَ را کورونا ویکسین سرکنگ ءِ کمک ءَ را ساڑاتگ۔ مز ن وزیرءَ ماحولیاتی مٹء ُ بدلی ءَ ر ا گرءُ دار کنگ ءِ ھاترءَ پاکستان ءِبیلن ٹری سونامی منصوبہ ءَ ہوار ایندگہ گامگیجانی ہوالگءَ سرپد کتگ۔ دوئیں راہشوناں ہمگرنچیں پڑآں کمک ءَ را گیش محکم کنگء ُ سی پیک گرین ڈویلپمنٹ کو بیلٹ اینڈ روڈ انیشی ایٹیو ءَ را جوانی ءَ دیمروئی دیئگ ءِ سرءَ تپاک کتگ۔ آئی ءَ میاں او ستمانی براتی ءَ گوں دزبندی کتگ کہ آ اوگان اُلس ءَ را زوت انسانی ء ُ معاشی کمک بہ کنت تنکہ آ یانی جنجال کم بہ بنت ۔ مزن وزیر ءَ گشتگ کہ دوئیں ملک آنی نیام ءَ شریداری ءَ را گیش کنگ ءِ ھاترءَ مزن تک ءِ یکے دومی ءِ گورءَ ڈل دیم دیئگ ءِ ضلورت اِنت۔۔ مزن وزیر ءَ اے موہ ءَ چین ءِصدر ءَ را پاکستان ءِ ترء ُ تاب کنگ ءِ دعوت ہم داتگ۔
