اسلام آباد۔ 26 اکتوبر (اے پی پی) وزیراعظم عمران خان چین نا صدر شی جن پنگ تون ٹیل فون آ گپ وتران کرے و کمیونسٹ پارٹی نا 100 می سال دے و چینی الس ءِ نیزگاری آن چٹفنگ کن بے مٹ سرسہبی تیا مبارکبادی تس، ہڑتوم آ راہشونک ہڑتوم آ ہمسایہ ملک آتا نیام اٹ تعلقداری تے پین سوگو کننگ آ امنا کریر۔ سے شنبے نادے آ وزیراعظم میڈیا آفس آن جاری بیان نا رداٹ وزیراعظم کمیونسٹ پارٹی نا سد سال اٹی چین ءِ نیزگاری آن کشنگ ، چاردہائی ٹی اصلاحات و شونداری آہم مبارکبادی تس ۔ وزیراعظم عمران خان کورونا دین اتون مون تننگ کن چین نا گام گیج وپدتموک ملک آتے کن چین نا امداد و پاکستان ءِ کورونا دین نا ویکسین تننگ اٹ کمکاری نا ستاءِ کرے۔ کورونا نا دین انا جہانی زرگزران آ منفی اثرآتیا گپ وتران کرسا ہڑتوم آ راہشونک زرگزرانی مشکل آتے کم کننگ، چین پاکستان آجو واپار نا ارٹ میکو ریسہ غان پبی فائدہ ہرفنگ و اقتصادی و واپاری تعلقداری تے پین سوگو کننگ آ امنا کریر، وزیراعظم سی پیک نا ڈٹ آتا سرسہبی، وخت آ بڑزکو آب انا رداٹ عملدرآمد نا ستاءِ کرے و سی پیک خصوصی اقتصادی زون تیٹی چینی زرکاری نا ستاءِ کرے۔ وزیراعظم پارے کہ ایم ایل ون ریلوائی ڈٹ انا دمدستی بناغان پاکستان ناقومی و علاقائی شونداری نا جیو اکنامکس وژن کن اہم پیش رفت مریک۔ وزیراعظم چاگڑدی بدلی تا چٹفنگ کن چین نا سرکڑدہ ئی کڑد انا ہم ستاءِ کرے۔ وزیراعظم چاگڑدی بدلی تا توننگ کن پاکستان نا بلین ٹری سونامی ڈٹ اتون اوار ایلو گام گیج آتا بارواٹ معلومدار کرے۔ ہڑتوم آ راہشونک تعلقدار بشخ آتے ٹی کمکاری ءِ پین سوگو و سی پیک گرین ڈویلپمنٹ ءِ بیلٹ اینڈ انیشی ایٹیو نا بڑزکو آب انا رداٹ مون آ دننگ آ امنا کریر۔ ہڑتوم آ راہشونک اوغانستان نا حالیت آتیا ہم گپ وتران کریر۔ اوجہانی برادری آن خواست کرے کہ او الس ءِ دمدستی انسانی و زرگزرانی امداد کمک کے تانکہ اوفتا مشکل آتے کم و نزوری و تین پہ تینی جنگ ءِ توننگ مرے وخت اس کہ داڑتون اوار اوار ملک انا پوسکن تفنگ اٹ کمک کننگے۔ وزیراعظم پارے کہ ہڑتوم آ ملک آتا نیام اٹ تزویراتی شریداری ءِ پین گیشتر کننگ کن بڑزکو کہول آ ہن وبرتا گرج ءِ۔ وزیراعظم داوخت آ چین نا صدر ءِ دورہ پاکستان نا تینا سلہ نا تجدید ءِ ہم کرے۔
