اسلام آباد۔ 26 اکتوبر (اے پی پی) صدر مملکت ڈاکٹر عارف علوی راج اٹ مثبت سوچ و طرز عمل نا مون آ دننگ کن زموارانہ وڑ تینا کننگ آ زور شاغسا پارینے کہ پورو ہم آہنگی و قوم انا دودوربیدگی گیشتری ءِ سیوت اٹ بدل کننگ کن امن و رواداری نا قدر آ مبنی پاکستان نا دودوربیدگی بیانیہ وخت انا اہم ءُ گرج اسے۔ سے شنبے نادے آ داڑے پاکستان نیشنل کونسل آف آرٹس اٹ ’’قومی یکجہتی و ثقافتی ہم آہنگی‘‘ نا سرحال آ اڈ ہلوک آ کانفرنس آن تران کرسا صدر پارے کہ پاکستان نا دودوربیدگ غٹ صوبہ و قوم تا رسم و رواج نا زیبا ءُ امتراج اسے۔ وزارت تعلیم و کسبی تربیت نا رداٹ قومی میرات و دودوربیدگ ڈویژن نا کنڈآن اِرادے ئی کانفرنس اٹ مچ آ ملک آن اسکالرآک بشخ ہلکر تانکہ قومی دودوربیدگی انضمام نا سرحال آ سجفنگ مرے۔ صدر مملکت پارے کہ پاکستان نا دودوربیدگ بقائے باہمی و ہم آہنگی نا تصور تون گنڈوک ءِ، قوم ءِ راجی قبولیت نا درشانی کننگ کن راہشون اصول فراوان کننگ نا گرج ءِ۔ اوپارے کہ مذہب و است خواہی تا تین پہ تینی تعامل گڑاس وخت تینے رواداری و سگ انا کسر آن اسہ کنڈ کننگ کیک، ہراتم ہم خاص ءُ عقیدہ اسے ایلوفتیا مسلط کننگک تو مصیبت و جھیڑہ غاک مون آ بریرہ۔ اوپارے کہ اسلامی دودوربیدگ ملک انا راج ءِ اسہ ایلو تون گنڈنگ کیک ہراہم آہنگی آ زور شاغک ۔ اوقوم آ زور شاغا کہ او مذہب نا آڑاٹ دہشت گردی و انتہاپسندی ءِ مون آ دروک آتیان ہُشار مریر، ہنداوڑ راجی جھیڑہ غاتے تہو تننگک۔ اوصوفی بزرگ آتا کلہو ءِ مون آ دننگ آہم زور شاغا ہرافتے ٹی است آتے گنڈنگ کن رواداری آ چکار کننگا۔ صدر عارف علوی پارے کہ دوقومی نظریہ پاکستان نا نظریاتی بنداو ءِ ہرااسہ قوم اسے جتا مذہبی، دودوربیدگی و روایتی شناخت آ چکار تخا۔ اوپارے کہ اینو نا ہندوستان اٹ ہندوانتہاپسند آرایس ایس مسلمان تا دودوربیدگی شناخت ءِ چٹفنگ کن گام گیج کننگ ءِ و خبڑدار کرے کہ دا حالیت آک تینٹ بھارت ءِ دودوربیدگی بھسکاری نا کنڈآ دننگ کیرہ۔ داوخت آ صدر مملکت راج اٹ مثبت سوچ و طرزعمل ءِ مون آ دننگ کن قوم اٹ بشخینچ ودی کننگ نا سوب مروک آ جعلی خبرتا رجحان ءِ ہلسا زمواروڑاس تینا کننگ آ زور شاغا۔ بنجائی وزیر تعلیم و کسبی تربیت شفقت محمود تینا تران اٹی پارے کہ پاکستان نا دودوربیدگ چندی رسم و رواج ، بولی و روایت آتیا تالان ءِ ہراٹی اونا یکتا زیبائی و رنگ اوار ءِ۔
