اسلام آباد۔ 26 اکتوبر (اے پی پی) وزیرخارجہ مخدوم شاہ محمود قریشی سے شنبے نادے آ ریاض اٹی تینا سعودی ہم منصب شہزادہ فیصل بن فرحان آل سعود تون اوڑدہی کرے۔ ہڑتوم آ وزیر خارجہ غاک جہانی کہول آ خاص وڑاٹ اقوام متحدہ و او آئی سی فورم تیا ہڑتوم آ کنڈآتا کمکاری ءِ ودفنگ آ امنا کریر۔ دفترخارجہ نا رداٹ سیکرٹری خارجہ سہیل محمود و سفارت خانہ نا سینئر آفیسر آک ہم داوخت آ ساڑی ئسر۔ وزیرخارجہ مخدوم شاہ محمود قریشی چاگڑدنا بابت جہانی کانفرنس نا اڈتننگ آ سعودی ہم منصب ءِ مبارکبادی تس و پارے کہ چاگڑد نا بابت اڈ ہلوک آ داکانفرنس، ڈیہہ ٹی تینا وڑنا اولیکو کانفرنس ءِ۔ شاہ محمود قریشی گمان ظاہر کرے کہ داکانفرنس نا اڈتننگ آن ڈیہہ نا ملک آتے چاگڑدی بدلی نا زہم آتون مون تننگ کن علاقائی نقطہ نظر اس تینا کننگ اٹ کمک رسینگک۔ ہڑتوم آ وزیرخارجہ غاک ہڑتوم آ کنڈآتا تعلقداری تتون اوار اوار تین پہ تینی است خواہی نا علاقائی و جہانی امور آہم گپ وتران کریر۔ ہڑتوم آ وزیرخارجہ غاک ہڑتوم آ ملک آتا نیام اٹ خوشگوار تعلقداری تے پین سوگو کننگ نا عزم انا درشانی ءِ کریر۔ اینخو سال نیویارک و اسلام آباد اٹ ہڑتوم آ وزیرخارجہ غاتا نیام اٹ مروک آ اوڑدہی تا حوالہ ءِ ترسا وزیرخارجہ مخدوم شاہ محمود قریشی ہڑتوم آ کنڈآتا تعلقداری تے مون آدننگ کن پاکستان نا عزم انا درشانی ءِ کرے۔ ہڑتوم آ وزیرخارجہ غاک جہانی کہول آ خاص وڑاٹ اقوام متحدہ و او آئی سی فورم تیا ہڑتوم آ کنڈآتا کمکاری ءِ ودفنگ آہم امنا کریر۔ وزیرخارجہ سعودی ہم منصب ءِ اوغانستان اٹ مون آ بروک آ انسانی تنکی نا خطرہ غان معلومدار کرسا اوغانستان اٹی دیرپا امن و زرگزرانی سوگوی کن جہانی برادری نا کنڈآن پبی و گچین گام گیج کننگ نا گرج آ زور شاغا۔
