اسلام آباد۔ 26 اکتوبر (اے پی پی) بنجائی وزیر امور کشمیرو گلگت بلتستان علی امین خان گنڈاپور پارینے کہ پاکستان اقوام متحدہ نا سلامتی کونسل نا قرارداد و کشمیری تا است خواہی نا رداٹ کشمیر نا ویل ءِ پرامن ایسر کننگ کن تینا پبی مخ تفی ءِ برجاتخک، 74 سال مست اینو(27 اکتوبر) نا دے کوزہ گیر بھارتی فوج کشمیر آ غیرکانودی کوزہ و کشمیری الس ءِ محکوم کننگ کن غٹ تر جہانی کانود و انسانی حق آتے لتاڑسا سرینگراٹ پترینگا، کشمیر آ بھارتی کوزہ نا برخلاف (27 اکتوبر) آ اڈتروک آ تہاردے انا وخت آ تینا کلہو اٹی او پارے کہ کشمیر نا نرزور الس داغیر کانودی کوزہ نا برخلاف پدریسہ مزاحمت نا درشانی ءِ کرینو۔ اوپارے کہ اینو کودک کشمیریک نہہ لکھ سلہہ بند بھارتی فوج انا ظلم و ستم نا مون آ بے خوف سلوک ءُ و کشمیری تا دا ہندی و چٹپروک آ جہد پک کیک کہ کشمیری تا عزم ءِ اسہ وڑنا جور اٹ ہم لتاڑنگ مفک۔ بنجائی وزیر پارے کہ کشمیری الس نا حق خودارادیت ءِ چٹفنگ کن 5 اگست 2019 آ بھارت غیرکانودی و اسہ کنڈی گام گیج آتا کمک اٹ مقبوضہ کشمیر نا جھیڑہ ئی علاقہ نا حیثیت ءِ بدل کننگ نا کوشست کرے، اومستی پارے کہ بھارت مقبوضہ جموں و کشمیر آ تینا رواکوزہ ءِ پین سوگو کننگ و کشمیری تا جتا شناخت ءِ چٹفسا اوفتے تینا ہی گل زمین آ اقلیت اٹ بدل کننگ نا دا پن انا حتمی ایسری نا بناءِ کرے۔ اوپارے کہ مقبوضہ جموں و کشمیر نا آبادی نا کچ ءِ بدل کننگ نا دابھارتی کوشست جہانی کانود، اقوام متحدہ نا چارٹر، سلامتی کونسل نا تعلقدار قرارداد و چارمیکو جنیوا کنونشن نا پاش آن پاش خلاف ورزی ءِ۔ بنجائی وزیر پارے کہ تدوک آ اِراسال آن بھارت 80 لکھ کشمیری تا بنداوی آجوئی آ سفاک فوجی گھیڑ و پابندی خلکونے۔ بنجائی وزیر پارے کہ بھارت مقبوضہ جموں و کشمیر اٹی انسانی حق انا بھلا خلاف ورزی تے دمدستی تورے و بھارت 5 اگست 2019 نا تینا غیرکانودی و اسہ کنڈی گام گیج ءِ پدی ہلے و اقوام متحدہ نا سلامتی کونسل نا تعلقدار قراردادآتیا عملدرآمد کے تانکہ کشمیری الس رائے شماری نا تینا حق ءِ کاریم اٹ اتنگ کیر۔ بنجائی وزیر پارے کہ پاکستان نا حکومت و الس کشمیری ایڑھ ایلم تا ناقابل تسخیر جوزہ و لاتعداد قربانی تیا اوفتے سلام پیش کینہ۔ اوداعزم انا درشانی ءِ کرے کہ پاکستان اقوام متحدہ نا سلامتی کونسل نا قرارداد و کشمیری تا است خواہی نا رداٹ کشمیر نا ویل ءِ پرامن ایسری کن تینا پبی مخ تفی ءِ برجاتخک۔
