دبئی۔ 26 اکتوبر (اے پی پی) متحدہ عرب امارات نا وزیر خارجہ شیخ عبداللہ بن زاید آل نہیان دبئی ایکسپو 2020 نا وخت آ اقوام متحدہ نا نائب سیکرٹری جنرل امینہ محمد تون اوڑدہی کرے۔ سعودی میڈیا نا رداٹ اوڑدہی ٹی ہڑتوم آ عہدیدار آک امارات و اقوام متحدہ نا نیام اٹ چندی بشخ آتے ٹی کمکاری و اقوام متحدہ نا سپورٹ پروگرام تے پین گچین کننگ اٹ کمکاری آ گپ وتران کریر۔ اوموسمیاتی بدلی تون اوار تین پہ تینی است خواہی نا امور آ گپ وتران کریر و موسمیاتی بدلی نا مون ءِ توننگ کن اسیجائی کوشست آتیا زور شاغار۔ امینہ محمد و شیخ محمد اقوام متحدہ نا دبئی ایکسپو 2020اٹی شرکت و جہانی شریدار آتا قیام ، آزموندہ و مہارت نا ہل و تس و جہانی چیلنج آتے ایسر کننگ اٹ اقوام متحدہ نا اہمیت آ گپ وتران کریر۔ داوخت آ شیخ عبداللہ اقوام متحدہ و اونا غٹ شوندساری ڈٹ آتے کن امارات نا بدل مفروک مخ تفی نا درشانی ءِ کرساپارے کہ اقوام متحدہ تینا پروگرام تا کمک اٹ پائیدار شونداری نا مسخت آتے پورو کننگ کن کوشست کننگ اٹی ءِ ہراانسانیت نا خذمت ءِ۔ اوڑدہی ٹی امارات نا وزیرمملکت جہانی کمکار و دبئی ایکسپو2020نا ڈائریکٹر جنرل ریم بنت ابراہیم الہاشمی ہم بشخ ہلک۔ دبئی ایکسپو ٹی اقوام متحدہ نا جتا ءُ پویلین اس جوڑ کننگانے ہرانا تھیم’’ ہم عوام، آخبت نا تعمیر اٹ اختہ‘‘ تخنگانے۔
