ریاض ۔25اکتوبر (اے پی پی): مزن وزیر عمران خان ءَ گوشت کہ پاکستان ءُ سعودی عرب ءِ نیام ءَ یکوئی بے درور انت، سعودی عرب ءَ مدام سکیں ساھت ءَ پاکستان ءِ گوما ھمبراہ داری کتگ، سعودی عرب ءِ سلامتی ءَ را اچ رنگ ءَ بیم ءِ آماچ بوھگ ءَ نئیلاں، بھارت ءِ گوما پاکستان ءَ ایوک ءَ کشمیر ءِ جیڈھ انت، اگاں یونائیٹڈ نیشن ءِ منوگری آنی رد ءَ بھارت کشیر ءِ وت واجئی ھک ءَ را بہ دات انت گڈا بھارت ءِ گوما اچ کشاں چیل نہ بوتگ انت۔ سعودی سرمایہ کاری ءِ واستہ پاکستان جوانیں ملک ات۔ آ دوشمبے ءَ پاکستان سعودی عرب انویسٹمنٹ فورم ءَ گوں گشتانک دیگ ءَ ات۔ مزن وزیر عمران خان ءَ لُکوکیں وھد ءَ انویسٹمنٹ فورم ءِ برجائی ءَ انجینئر خالد بند عبدالعزیز الفلیع ءِ کرد ءَ را ساڑات۔ مزن وزیر عمران خان ءَ گوشت کہ پاکستان ءُ سعودی عرب ءِ وت مہ وتی یکوئی بے درور انت ایشانی ریشگ باز جھلانک انت۔ پاکستان ءَ ھرکسی حکومت بہ بیت سعودی عرب ءِ گوما ھاسیں یکوئی برجا بنت۔ سعودی عرب حرمین شریفین ءِ سرڈگار انت۔ سعودی عرب ءَ ھمک سکیں ساھت ءَ پاکستان ءِ گوما ھمبراہ داری کتگ، دوئیں ملک آنی نیام ءَ یکوئی برجا ئی السی تک ءَ مھکم انت۔ مزن وزیر ءَ گوشت کہ سعودی ولی زمانگ محمد بن سلمان ءِ جوانیں سروکی ءَ وتی ملک ءَ را گیش پازیٹیو چیز آرگ ءِ جوزگ است۔ مزن وزیر ءَ گوشت کہ 1960 ءِ زمانگ ءَ چہ پاکستان ءِ معیشت دگنیا ءَ ترندی ءَ گوں سہرا بوھوکیں معیشت آنی تہ ءَ ھوار بوتگ، ایشی ءِ ادارگ مھکم بوتگ انت، پاکستان انٹرنیشنل ایئرلائن دگنیا ءِ جوانتریں پنچ شش ائیر لائن آنی تہ ءَ شمار کنگ بیت۔ اے وھد ءَ پاکستان جوانیں کشک ءَ رھادگ انت پدا ھم بد بھتی ءَ چہ ایشی کشک سرگردان بوتگ انت۔ انوں یک رند ءِ پد ءَ ایش وتی کشک ءَ رھادگ بوھگ ءَ انت، آئی ءَ گوشت کہ صنعت آنی پڑ ءَ را دیمروئی دیگ ءَ آں۔ مزن وزیر ءَ گوشت کہ پاکستان ءِ 22 کروڑ ءِ آباتی ءَ گیشتر 30 سال ءَ چہ کم امبر ءِ زھگ آنی انت ایش جوانیں گپ ات ایش دیمروئی ءِ پڑ ءَ ارزشتی ایں بستار ءِ دار ای۔ پاکستان ءِ ورنا لس مردمی ازمکاری ءُ جغرافیائی سیم سر ءِ ارزشت ءِ تہ ءَ گیشی کنت۔ آئی ءَ گوشت کہ پاکستان ایشیائی ءُ ایشی ءِ پشت ءِ مارکیٹ آنی واستہ گیٹ وے ات ءُ پاکستان وتی ا ے جیو شریکداری ءِ چیر دستی ءَ نوکیں زمانگ ءِ لوٹ آنی رد ءَ دمگی یکوئی ءِ بنیات ءَ میاں اوستمانی تجارت ءِ واستہ موہ ءِ لوٹ ءَ کنت۔ آئی ءَ گوشت کہ پاکستان ءِ ھمساھگ آنی تہ ءَ دگنیا ءِ دو گہتریں مارکیٹ انت۔ پاکستان ءَ چین ءِ گوما یکوئی باز بے درور انت، اگاں بھارت ءِ گوما کشمیر ءِ جیڈھ ءَ را ایمنی ءَ گوں گیوار بہ بوت انت گڈا اے موہ ءَ چہ باز سیت چست کنگ بوتگ ات۔ اے موہ ءِ سر ءَ سعودی کمپنی ایس اے بی آئی سی، اے سی ڈبلیو اے پاور، مادن ایس اے ایل آئی سی، ایل زمل گروپ، ایل باوانی گروپ، ریاض بینک ءُ انٹر پرینیورز ءِ نماھند ءُ پاکستانی کاروباری سروک آں بھر زوری کت وھدیکہ سعودی عرب ءِ وزیر برائے سرمایہ کاری انجینئر خالد ایلفلیع، وزیر ءِ درئی کار شاہ محمود قریشی ، مشیر ھزانگ شوکت ترین ءُ وزیر ءِ ھاٹیگ حماد اظہر ءَ ھم گشتانک دات۔ وزیر ءِ درئی کار شاہ محمود قریشی ءَ وتی گشتانک ءَ پاکستان ءِ جیو پولیٹیکل ءَ چہ جیو اکنامک ٹرانسفر ءُ وزیر ءِ ھاٹیگ ءَ پاکستان ءَ کشت ءُ کشار، ھاٹیگ ، لائیو سٹاک ءُ ایندگر شوبگ آنی تہ ءَ سرمایہ کاری ءِ دراج بُریں موہ آنی ھوالگ ءَ زور پر دات۔ سعودی عرب ءِ وزیر برائے سرمایہ کاری ءَ سعودی عرب ءُ پاکستان ءِ نیام ءَ دراج بُریں ءُ دروری یکوئی آنی سر ءَ چمشانک دیان ءَ اے جزم ءِ درشان کت کہ دوئیں ملک آنی نیام ءَ وت مہ وتی تجارت، سرمایہ کاری ءُ کاروباری رابطہ آناں گیش برجم کنگ بہ بیت۔
