اسلام آباد۔ 25 اکتوبر (اے پی پی) وزیرداخلہ شیخ رشید احمد پارینے کہ بھارت نا برخلاف ٹی 20 ورلڈ کپ اٹ پاکستان نا تاریخی سرسہبی آ جاڑ انگا شارتیٹی پبی جشن و بھارت اٹ تینا کرکٹر نا اُراتیا خل خو مس، قوم ءِ تاریخی سرسہبی آ مبارکباد پیش کیوہ، ملکی تاریخ اٹ اولیکو وار قوم ءِ داخہ بھلو خوشی اس دُوبسنے، کالعدم تحریک لبیک پاکستان تون باندات جوانی اٹ ایسر کننگ خوانہ، غٹ باندات آتے چارشنبے آ کابینہ نا دیوان اٹ تخنہ، اوغان شاری تیکن ویزہ فیس و آن لائن ویزہ سروس ءِ چٹفنگانے۔ دوشنبے نادے آ وزارت داخلہ ٹی پریس کانفرنس آن تران کرسا اوپارے کہ تدوک آ دے بھارت نا برخلاف ٹی ٹونٹی ورلڈ کپ نا مروک آ میچ بیرہ کرکٹ اس الوکہ بلکن کرکٹ پلس اس ئس۔ ہراوڑ بھارتی الس تینا کرکٹر نا اُراتیا خل خو کریر اوفتیان چپ پاکستانی الس بابراعظم ، رضوان و شاہین آفریدی کن نیک است خواہی تا درشانی ءِ کرے و ٹیم انا سرسہبی نا جشن ءِ پبی وڑاٹ اڈ تسر۔نن جاڑ انگا شار تیٹی مہالو آن کینٹر آتے اینک کریسن تانکہ داجاگہ نا شاریک داتاریخی سرسہبی نا جشن ءِ پبی وڑاٹ اڈتننگ کیر۔ داپاکستان ناکرکٹ نا پڑاٹ بھاز بھلو سرسہبی اسے۔ بھارت ءِ 10 وکٹ آتے اٹ شکست مسنے۔ وزارت داخلہ و وزارت خارجہ نا کمامدارآک کابل آن بروک آ مخلوق تون سرجم اوڑدہی کرینو ۔ داوخت آ چمن بارڈر بند ءِ۔ طورخم آن مخلوق ءِ آسراتی تننگ انگ ءِ۔ اوغان ناجوڑ شاری تے درمان کن بروک آتے موکل تننگانے۔ اسہ دے اٹی 10 ہزار پاسپورٹ جاری کننگانے۔ ہرشارآن پاسپورٹ ہلنگ مریک۔ بنجائی دارالحکومت اسلام آباد اٹی 1122 سروس، فروٹ بازار و زالبول آتے کن بازار خلنگ والا اُن۔ وزیرداخلہ پارے کہ ٹی ایل پی تون باندات ءِ جوان وڑاٹ ایسر کننگ خوانہ۔ سعد رضوی تون لاہور اٹی اوڑدہی کرینن و اودے معلومدار کرینن کہ پاکستان نا تنظیم تیا جہانی ادارہ غاتا نظر ءِ۔ فرانس یورپی یونین نا کرتا دھرتا ءِ و پاکستان اسلامی دنیا نا اسہ ایٹمی ءُ واک اسے و دنیا نا ننے آ نظر ءِ۔ اوپارے کہ توڑ پھوڑ غیرکانودی مریک۔ اوپارے کہ ٹی ایل پی تون گچین مذاکرات مس۔ داباندات پنجاب حکومت نا ئس ولے سعد رضوی و بغدادی نا اسرار آ کنے کمیٹی ٹی اوار کننگا۔ داباندات ءِ کبینٹ اٹ دینہ۔ اوپارے کہ پرنسپل سیکرٹری اعظم خان ءِ پارت کننگاکہ دینی مدرسہ غاتا اکاؤنٹ آتے بحال کننگے، داڑآن مدرسہ غاتا اکاؤنٹ آتیا نظر تخنگ مریک۔ نادرا وپولیس ءِ ڈویلپ کننگ اُن و ہرجاگہ غان اسہ دے اٹی پاسپورٹ دوئی کننگ مریک۔ اپوزیشن ٹی وی ٹی وی کننگ ءِ و اوفتا ٹیرتکائی ٹی وی پروگرام تسکان ءُ۔ وزیرداخلہ پارے کہ پرامن برانز ہرسیاسی جماعت نا حق مریک۔ وزیراعظم عمران خان نا کماشی ٹی کبینی نا مون ءِ تورنہ۔ اسہ سوج اسے نا ورندی ٹی شیخ رشید احمد پارے کہ اِلہ و ایلم نا مسڑ پاکستان اٹ امریکہ نا ناظم الامور تون اوڑدہی کریر ولے امریکی ناظم الامور ءِ داسمائس کہ اُراٹی اِراپارٹی ءُ۔ داسہ پاکستان نا سیاست نا فیصلہ پاکستان اٹ مریک۔
