کابل۔ 25 اکتوبر (اے پی پی) اقوام متحدہ نا ورلڈ فوڈ پروگرام خبڑدار کرسا پارینے کہ مہالو آن نزوری نا گواچی اوغانستان ءِ دنیا نا بدترین انسانی تنکی مون تروک ءِ ہرانا سوب آن اینخو یخ انا موسم اٹ 2 کروڑ 20 لکھ آن زیات اوغان شاری غذائی کاختی نا گواچی مننگ کیرہ۔ فرانسیسی خبررساں ادارہ نا رداٹ اقوام متحدہ نا ورلڈ فوڈ پروگرام نا ایگزیکٹو ڈائریکٹر ڈیوڈ بیسلے دوشنبے نادے آ اسہ بیان اسے ٹی پارے کہ اگہ نن اوغان الس نا زند انا رکھ اکن امداد نا مون آ دننگ کن گام گیج کتون تو اینخو نا یخ انا موسم اٹی لکھ آ اوغان شاری ہمپنگ و بین نا نیام اٹ اسہ گڑاسے گچین کننگ آ بیوس مریرہ۔ اوپارے کہ اوغانستان اٹی غذائی تنکی دنیا نا بدترین انسانی تنکی تیان اسٹ ءِ۔ اوپارے کہ اگہ نن اوغانستان اٹ بھسکاری آن بچنگ کن وخت آ گام گیج کتون تو نن پورو بھسکاری نا دنگ آ سرمرینہ۔ اوپارے کہ بین ودنگ ءِ و چناک داڑآن بھاز زہمی مننگ ءُ۔ نن اوغان الس ءِ قول آتیا ریفنگ کپنہ بلکن ننے اوغانستان کن امداد نا قول آتے عملی دروشم اس تروئی مریک۔ اوپارے کہ جہانی برادری ءِ ترندی اٹ بے قابو مرسا داتنکی تون مون تننگ کن یکجا مننگ نا گرج ءِ۔ اقوام متحدہ نا ایجنسی ورلڈ فوڈ پروگرام و اقوام متحدہ نا خور و کشت وکشار نا تنظیم اسہ بیان اسے ٹی پارینو کہ داہر2 آن اسہ اوغان شاری ءِ فیز 3 انا غذائی تنکی یا فیز 4 انا ہلہلہ ئی غذائی کاختی مون تروک ءِ۔ عہدیدار آک پاریر کہ فیز 4 قحط آن اسہ درجہ کم انا حالیت آک ءُ و سالہ خانہ جنگی آن پیش تمنگ نا پبی کوشست کروک آ ملک اوغانستان اسہ دہائی ٹی بدترین یخ انا موسم تون مون تننگ ءِ۔
