حکومت کبینی نا سوب آن لس بندغ نا مشکل آتیان جوان وڑاٹ معلومدار ءِ،ضلع و تحصیل نا کہول آ پرائس کنٹرول کمیٹی تے فعال کننگانے، منافع خور و کوڑی کروک آتا برخلاف بے پرخ کریک ڈاؤن برجاسلک، وزیراعظم عمران خان

لاہور۔ 22اکتوبر (اے پی پی) وزیراعظم عمران خان پارینے کہ حکومت کبینی نا سوب آن لس بندغ نا مشکل آتیان جوان وڑاٹ معلومدار ءِ، ضلع و تحصیل نا کہول آ پرائس کنٹرول کمیٹی تے فعال کننگانے، منافع خور و کوڑی کروک آتا برخلاف بے پرخ کریک ڈاؤن برجاسلک، پنجاب اٹی برجاشونداری ڈٹ آتے تخوک آ مداٹ پورو کننگے، کانود نا بالادستی ءِ پک کننگے۔ داخیال آتا درشانی ءِ او وزیراعلیٰ پنجاب سردار عثمان بزدار تون گپ وتران کرسا کرے ہرا جمعہ نادے آ داڑے اوڑتون اوڑدہی کرے۔ داوخت آ چیف سیکرٹری پنجاب کامران علی افضل و آئی جی پنجاب راؤ سردار علی خان ئسک ہم ساڑی ئسر۔ وزیراعظم آفس نا میڈیا ونگ آن جاری بیان نا رداٹ وزیراعظم ءِ صوبہ نا انتظامی و شونداری امور آ حوال تننگا۔ پین برجا شونداری ڈٹ و السی آسراتی اسکیم تا بارواٹ ہم معلومدار کننگا۔ وزیراعظم عمران خان پارے کہ حکومت کبینی نا سوب آن لس بندغ نا تکلیف آن جوان وڑاٹ معلومدار ءِ و پائیدار گام گیج کرسا مخلوق ءِ زیات آن زیات ریلیف نا فراوانی ءِ پک کننگ ءِ۔ کبینی ءِ کنٹرول کننگ کن ضلع و تحصیل نا کہول آ پرائس کنٹرول کمیٹی تے فعال کننگانے۔ منافع خور و کوڑی کروک آتا برخلاف بے پرخ کریک ڈاؤن برجاسلک۔ وزیراعظم تعلقدار کمامدارآتے پارت کرے کہ او پنجاب اٹی برجاغٹ شونداری ڈٹ آتے تخوک آ وخت انا تہہ ٹی پورو کیر تانکہ الس نا آسراتی مرے۔ وزیراعظم پارے کہ الس نا فائدہ کن غٹ السی آسودہی ڈٹ آتا گچین آب ءِ پک کننگک۔ کانود غٹ اکن بریبر ءِ۔ کانود نا بالادستی ءِ پک کننگ کن حکومت ہر ممکن گام گیج کننگ ءِ۔