کوئٹہ۔ 22 اکتوبر (اے پی پی) گورنر بلوچستان سید ظہور احمد آغا پارینے کہ صوبہ بلوچستان اٹ محرومی و پسماندگی نا چٹفنگ کن السی گرج آتون ہم گرنچ پالیسی تے جوڑ کننگ، بنداوی پنجر ءِ سوگو کننگ و گچین طرز حکمرانی نا بھرم تے الس اسکان سرکننگ کن دورس گام گیج کننگ نا سخت گرج ءِ۔ جان جوڑی و تعلیم نا بشخ آتا سوگوی نا بابت حکومتی گام گیج آتیان بیدس یورپی یونین و ایلو جہانی ادارہ غاتا کمک و راہشونی کمکار جوڑ مریک ۔ داخیال آتا درشانی ءِ او پاکستان اٹ تعینات یورپی یونین نا سفیر اینڈرولاکامیناراتون گپ وتران کرسا کرے ہرا گورنر ہاؤس اٹ اوڑتون اوڑدہی کرے۔ گورنر اودے بخیر کرساپارے کہ یورپی یونین بلوچستان اٹ چندی بشخ آتے ٹی کمک کرسا کرینے و آخبت اٹ ہم تعلیم، جان جوڑی و توانائی و کاریم نا کچ ءِ ودفنگ نا بشخ اٹی یورپی یونین نا کمکاری نا گمان ءِ۔ اوپارے کہ ننے ڈیہہ ٹی پیش بروک آ زرگزرانی بدلی تا رداٹ تینا پوسکن آ چین ءِ پوسکن آ فنی و تکنیکی مہارت ہیل تننگ آ چکار کروئی مریک۔ دارداٹ صوبہ ٹی سد آن زیات فنی و تکنیکی ادارہ ساڑی ءِ، خاص کر یورپی یونین دا فنی ادارہ غاتا پورو فعالیت و مچ آ صوبہ نا ورناتے پوسکن آ مہارت ہیل تننگ اٹ ننا کمک و راہشونی ءِ کننگ کیک۔ یورپی یونین نا سفیر باور کرفے کہ آخبت ہم ننا کنڈآن بلوچستان اٹی چندی بشخ آتے ٹی کمکاری برجاسلک۔
