اسلام آباد۔ 22 اکتوبر (اے پی پی) وزیراعظم عمران خان (پگہ) ہفتہ نادے آ مسہ دے ئی سرکاری دورہ غا سعودی عرب آ کاہک۔ دورہ ٹی وزیراعظم سعودی سرکڑدہ غاتون ہڑتوم آ کنڈآگپ وتران، پاکستان اٹ زرکاری نا مون آ دننگ نا بابت دود و دے ٹک نیامی گرین انیشی ایٹیو سروک دیوان اٹ بشخ ہلیک۔ جمعہ نادے آ ترجمان دفترخارجہ نا کنڈآن جاری بیان نا رداٹ وزیراعظم عمران خان (پگہ) ہفتہ نادے آ سعودی عرب نا مسہ دے ئی دورہ غا روانہ مریک ۔ وزیراعظم عمران خان ولی عہد شہزادہ محمد بن سلمان بن عبدالعزیز نا سلہ غا سعودی عرب نا دورہ ءِ کننگ ءِ۔ وزیراعظم تون اوار وزیرخارجہ شاہ محمودقریشی وکابینہ نا ایلو باسک آتون اوار بڑزکو کہولی ڈل ہم مریک۔ وزیراعظم عمران خان دے ٹک نیامی گرین انیشی ایٹیو سروک دیوان نا بنائی دود اٹ بشخ ہلیک ہراڑے او چاگڑدی بدلی نا سوب آن پدتموک ملک آتے مون تروک ویل آتیا نقطہ نظر پیش کیک۔ وزیراعظم چاگڑدی چیلنج آتون مون تننگ کن فطری ایسر نا بابت پاکستان نا آزموندہ غاتے ہم تالان کیک۔ داسروک دیوان ولی عہد شہزادہ محمد بن سلمان بن عبدالعزیز نا گام اسے۔دے ٹک نیامی ڈیہہ نا بابت داوڑنا دا اولیکو دیوان ءِ، دا گرین سعودی عرب و گرین دے ٹک نیامی گام گیج ءُ ہراکہ ولی عہد مارچ 2021 ء ٹی بناکرے ہرانا مسخت قدرت و کرہ ارض نا رکھ ءِ۔ وزیراعظم عمران خان داہڑتوم آ گام گیج آتا ستاءِ کریسس و پاکستان نا سرسوز و ساف پاکستان و زیراعظم نا 10 ارب ٹری سونامی نا آزموندہ غاتیان معلومدار کننگ نا سلہ خلکوسس۔ وزیراعظم عمران خان سعودی سرکڑدہ غاتون ہڑتوم آ کنڈآتیا گپ وتران کیک ہرافتے ٹی سعودی عرب اٹی پاکستانی تا راجی آسراتی، پاکستانی خواری کش آتے کن پین وارخواہی ودی کننگ، زرگزرانی و واپاری تعلقداری آ پیش رفت آ چکار کننگک۔
