پاکستان نا ہیلتھ کارڈ اسکیم نیزگار آتے کن اڑزآن درمان نا دوئی کننگ اٹ معجزہ سے آن کم اف، بنجائی وزیر مواصلات و پوسٹل سروسز مراد سعید نا ٹویٹ

اسلام آباد۔ 22اکتوبر (اے پی پی) بنجائی وزیر مواصلات و پوسٹل سروسز مراد سعید پارینے کہ پاکستان نا ہیلتھ کارڈ اسکیم نیزگار آتے کن اڑزآن درمان نا دوئی کننگ اٹ معجزہ سے آن کم اف۔ جمعہ نادے آ تینا اسہ ٹویٹ اسے ٹی بنجائی وزیر مواصلات پارے کہ پاکستان نا ’’معجزانہ‘‘ ہیلتھ کارڈ اسکیم نیزگارآتے کن اڑزآن درمان فراوان کیک۔ اوٹویٹر آ دی ٹیلی گراف اٹ شینک مروک آ اسہ نیزگار سیکورٹی گارڈ اشتیاق احمد نا روداد آ مبنی اسہ خبرنا تراشہ اس ہم لنک اتون شیئرکرے ہراٹی پاننگانے کہ پشاور نا ہنکینی اشتیاق کم تنخوادار سیکورٹی گارڈ است انا مرض اٹ اختہ ئس ہرا درمان و کبین آپریشن نا سوب آن فریشان ئس۔ اشتیاق احمد ءِ کیہی سا ل آن است انا تکلیف ئس، ولے سرجری کن اودے 2 ہزار پاؤنڈ ملنگ نا گمان بھلو وخت اسے آن ناممکن نظر بسکہ۔ کمک کن اللہ نا کنڈآ ہُننگ آن بیدس ہچ ءُ چارہ اس الوکہ۔ داوڑنا حالیت آتے ٹی پاکستان تحریک انصاف نا حکومت ہیلتھ انشورنس اسکیم اس درستی راستی کرفے ہرا اشتیاق کن معجزہ سے آن کم الوکہ و سرجری آن پد او دراخ جوڑ ءُ زند اس تیر کننگ ءِ۔ داتراشہ ٹی مستی پاننگانے کہ حکومت نا مالی کمکاری آن چلینگوک آ ہیلتھ انشورنس اسکیم ءِ مچ آ پاکستان اٹ درستی راستی کرفنگ انگ ءِ۔ جان جوڑی انصاف کارڈ وزیراعظم عمران خان نا حکومت اسہ فلیگ شپ پالیسی اسے نا وڑاٹ بناکرے ہرازوت دنیا نا پنچ میکو غٹ آن زیات آبادی والا ملک انا احاطہ ءِ کیک۔