اسلام آباد۔ 22 اکتوبر (اے پی پی) بنجائی وزیر حوالکاری و شینکاری چوہدری فواد حسین پارے کہ پنجاب نا ہر خاہوت ءِ جان جوڑی کارڈ آتا کمک اٹ دہ لکھ روپئی اسکان درمان کرفنگ نا آسراتی دوئی مریک، جان جوڑی ، تعلیم و چار بنداوی گرج انا گڑا نُت، بورہ، دال و سی آ بھلو ریلیف اس اتنگ اُن، بنداوی سیاسی اصلاحات آن بیدس ملک مون آ ہِننگ کپک۔ داہیت ءِ او جمعہ نادے آ تینا اسہ ٹویٹ اسے ٹی پارے۔ بنجائی وزیر حوالکاری پارے کہ خیبرپختونخوا غان پد داسہ پنجاب نا ہر خاہوت ہرسال دہ لکھ روپئی اسکان جان جوڑی کارڈ انا کمک اٹ دوئی کننگ کیک، دا گیم چینجر پروگرام نا کمک اٹ داسہ کوالٹی درمان نیزگارانگا نیامی تپہ اسکان ہربندغ ءِ دوئی مریک۔ چوہدری فواد حسین پارے کہ جان جوڑی،م تعلیم و چار بنداوی آ ضرورت نا گڑانُت، بورہ، دال و سی آ بھلو ریلیف اس اتنگ اُن۔ اوپارے کہ جان جوڑی کارڈ پروگرام پنجاب اٹ انشاء اللہ دسمبر آن بناکیک و مارچ اسکان مچ آ پنجاب اٹی جان جوڑی کارڈ ملک۔ بنجائی وزیر حوالکاری پارے کہ جان جوڑی کارڈ ءِ الس تینا منشااٹ ڈاکٹر یا ہسپتال اسے ٹی کاریم اٹ اتنگ کیک، سرکاری آخا پرائیویٹ ڈاکٹر و ہسپتال ہم داسہ الس نا درمان کن بے معاوضہ غان میسرمریک۔ تینا اسہ پین ٹویٹ اسے ٹی بنجائی وزیر پارے کہ فیک نیوز نا بابت کانود اس جوڑ کرسا کابینہ نا حوالہ کرینن، 2018 آن پاننگ اُٹ کہ بنداوی سیاسی اصلاحات آن بیدس ملک مون آ ہِننگ کپک، میڈیا و عدالتی اصلاحات المی ءِ۔
