چین پاکستان نا اہم واپاری شریدار ءِ، پاکستانی پوریاگرو کاروباری بندغ آک واپاری میلہ کانٹن فیئر اٹی بشخ ہلسا کیرہ، پاکستانی قونصل جنرل دیار خان

بیجنگ۔ 22 اکتوبر (اے پی پی)چین نا صوبہ گوانگ ڈونگ نا شار گوانگ زہوٹی پاکستانی قونصل جنرل دیار خان پارینے کہ چین پاکستان نا اہم واپاری شریدار ءِ وپاکستانی پوریاگر و کاروباری بندغ آک آخبت اٹ چین نا واپاری میلہ کانٹن فیئر اٹی بشخ ہلسا کیرہ۔ اوکانٹن فیئر نا وخت آ گپ وتران کرسا پارے کہ چین نا صوبہ گوانگ ڈونگ پاکستان نا غٹ آن بھلا واپاری شریدار ءِ و کانٹن فیئر ننکن بھاز اہمیت تخک و نن داٹی بشخ ہلسا کینہ۔ چین نا 130 می امپورٹ ایکسپورٹ فیئر ہرادے کانٹن فیئر ہم پاننگک کورونا دین انا سوب آن 15 اکتوبر آ صوبہ گوانگ ڈونگ نا شار گوانگ زواٹی آن لائن و آف لائن اڈ ہلک ہرا 19 اکتوبراسکان برجاسلیس۔ پاکستانی قونصل جنرل دیار خان پارے کہ کانٹن فیئر نا آن لائن اڈتننگ بھاز تخلیقی ئس و کورونا دین اٹی جہانی واپار ءِ ودفنگ نا دا اسہ گچین ءُ ذریعہ اس مریک ۔ اوپارے کہ نن پاکستان نا وزارت واپار و چیمبر آف کامرس نا کمک اٹ آن لائن کانٹن میلہ ءِ فعال وڑاٹ مون آ دینہ۔ جہانی پوریاگرآک پارینو کہ نن پاکستان اٹ پین مصنوعات آتا مون آ دننگ نا چاری اُن۔