اسلام آباد۔ 21 اکتوبر (اے پی پی) وزیراعظم عمران خان پارینے کہ ورناچین ءِ اسلامی تاریخ نا بارواٹ آگاہی فراوان کننگ کن پوسکن آ میڈیا ءِ کاریم اٹ اتوئی مریک و روایتی سرحال آتیان اسہ پلو تاریخی کسیہ غاتیا مبنی راگ و فلم جوڑ کروئی مریک۔ داخیال آتا درشانی ءِ او فلمساز شہزاد نواز، ترک پروڈیوسر ایمرے کونک، سید جنید علی شاہ و ڈاکٹر کاشف تون گپ وتران کرسا کرے ہرافک پنچ شنبے نادے آ داڑے اوڑتون اوڑدہی کریر۔ اوڑدہی ٹی سینیٹ نا قائمہ کمیٹی حوالکاری و شینکاری نا چیئرمین سینیٹر فیصل جاوید ہم ساڑی ئسک ۔ وزیراعظم پارے کہ صلاح الدین ایوبی تاریخ نا ہندن ءُ کڑد اسے ہرانا دیکی ہم درور آتے ایتک، اوبیت المقدس نا تاریخی فتح غان پد لس معافی نا پڑو ءِ کرے۔ وزیراعظم پارے کہ صلاح الدین ایوبی نا زند آ سیریز ورناتے دا تاریخی کڑد انا بارواٹ آگاہی ایتک۔ اوڑدہی ٹی وزیراعظم ءِ پاکستان و ترکی نا نیام اٹ اسیجائی ڈٹ صلاح الدین سیریز آ سرجمی اٹ معلومدار کننگا۔ سیریز آ ڈٹ بندی پورو ءِ وخت اس کہ اونا شوٹنگ نا بناءِ بروک آ سال اپریل اٹ کننگک۔
