APP68-211021 KABUL: October 21 - Foreign Minister Makhdoom Shah Mahmood Qureshi met the Prime Minister of Interim Afghan Government of Taliban, Mullah Hasan Akhund. APP

کابل۔ 21 اکتوبر (اے پی پی) وزیرخارجہ مخدوم شاہ محمود قریشی پارینے کہ پاکستان، اوغانستان نا خڑکی ہمسایہ ملک آتون ملسا ، ڈیہہ ٹی امن و سوگوی کن تینا تعمیری کڑد ءِ ادا کننگ کن سنبرینگوک ءِ۔ داہیت ءِ او پنچ شنبے نادے آ کابل اٹی اوغانستان نا عبوری وزیراعظم ملاحسن آخوند تون اوڑدہی ٹی پارے۔ اوغان عبوری حکومت نا وزیر خارجہ امیر خان متقی ہم داوخت آ ساڑی ئسک وخت اس کہ وزیراعظم نا نمائندہ خصوصی اوغانستان محمد صادق، سیکرٹری خارجہ سہیل محمود، اوغانستان اٹی تعینات پاکستانی سفیر منصور احمد خان، بڑزکو عسکری سرکڑدہ وپاکستانی ڈل انا ایلو باسک آک ہم دااوڑدہی ٹی ساڑی ئسر۔ اوڑدہی ٹی ہڑتوم آ کنڈآتا تین پہ تینی است خواہی نا باندات، واپاری و اقتصادی بشخ آتے ٹی کمکاری ءِ ودفنگ و اوغان الس ءِ زرگزرانی تنکی آن کشنگ کن چندی پلو آتیا گپ وتران کننگا۔ اوغانستان نا عبوری حکومت نا وزیراعظم ملاحسن آخوند وزیرخارجہ مخدوم شاہ محمود قریشی و پاکستانی ڈل ءِ کابل آ بننگ آ بخیر کرے۔ وزیرخارجہ شاہ محمود قریشی پارے کہ پاکستان، اوغانستان اٹی دیرپاامن و سوگوی نا خواہندار و انسانی بنداو تیا اوغان ایلم تا کمک کن سنبرینگوک ءِ۔ اوپارے کہ پاکستان، اوغانستان تون ہڑتوم آ کنڈآتا واپار ءِ ودفنگ نا خواہندار ءِ۔ اوغان شاری خاص وڑاٹ پوریاگرتیکن ویزہ آسراتی ، پوسکن آ بارڈر پوائنٹ آتا بنا و ہن و براٹی آسراتی نا فراوانی ہندا چرجوئی نا کڑیک ءُ۔ شاہ محمود قریشی پارے کہ پاکستان، اوغانستان نا خڑکی ہمسایہ ملک آتون ملسا، ڈیہہ ٹی امن و سوگوی کن تینا تعمیری کڑد ءِ ادا کننگ کن سنبرینگوک ءِ۔ اوغان حکومت نا عبوری وزیراعظم ملاحسن آخوند انسانی امداد نا وخت آ فراوانی آ پاکستانی سرکڑدہ غاتا منت واری ءِ ہرفے۔