اسلام آباد۔ 21 اکتوبر (اے پی پی) وزیرداخلہ شیخ رشید احمد پارینے کہ حکومت کبینی تون اوار غٹ ویل و چیلنج آتا مون ءِ تورک، وزیراعظم عمران خان ریاست مدینہ نا وڑآ حقی آسودہی ریاست اسے نا جوڑ کننگ کن کوشست کننگ ءِ پاکستان اٹی غٹ ءِ جمہوری و سیاسی آجوئی دوئی ءِ، اسلام آباد پولیس کن شہداپیکج پنجاب پولیس نا بریبر کننگانے۔ داخیال آتا درشانی ءِ او پنچ شنبے نادے آ پولیس لائنز اٹی ایئرپٹرول یونٹ نا بنا و پاسنگ آؤٹ پریڈ نا دود آن تران و میڈیا تون گپ وتران کرسا کرے۔ وزیر داخلہ پارے کہ ایئر پٹرول یونٹ نا بناءِ کننگانے۔ داڈرون تا کمک اٹ سیف سٹی تون منسلک مریک و پولیس تون پوسکن آہائی ٹیک گاڈی ہم مریک۔ اوپارے کہ اسلام آباد پولیس کن شہداپیکج ءِ پنجاب پولیس نا بریبر کننگانے، اسلام آباد پولیس نا اینٹی رایٹ یونٹ کن اسہ ہزار ورنابھرتی نا منظوری مسنے۔ اوآئی جی اسلام آباد ءِ پارت کرے کہ میرٹ آ بھرتی نا عمل ءِ زوت بناکننگے۔ وزیرداخلہ پارے کہ پولیس ناتنخواہ تے گچین کننگ کن کوشست برجاءِ، داچرجوئی ٹی وزیرخزانہ تون ہیت کرینن۔ وزیرداخلہ پارے کہ 400 ملین روپئی نا بھلو زر اس تھانہ غاتے تننگانے۔ کنا دور اٹی شہداپیکج کن تننگانے۔ اوپارے کہ بنجائی دارالحکومت اسلام آباد ءِ رکھ کننگ آ پولیس ءِ سلام پیش کیوہ۔ اوکان پد میڈیا تون گپ وتران کرسا وزیرداخلہ پارے کہ اپوزیشن جمعہ جمعہ گوازی کننگ ءِ، اونا اولیکو برانزی مچی ٹی کبینی آن زہمی مروک آ الس شرکت کتو۔ وزیراعظم عمران خان 5 سال ءِ پورو کیک و حکومت عمران خان نا کماشی ٹی کبینی نا جن ءِ بوتل اٹ بند کیک۔ اوپارے کہ وزیراعظم نا الس نا ویل آتیا سخت نظر ءِ و او چرجوئی اتون کبینی نا چٹفنگ کن کوشست کننگ ءِ۔ حکومت نا مون آ اہم جہانی ویل و چیلنج ہم ارے ہرافتے تون مون تروئی ءِ۔ حکومت غٹ ویل آتا مون ءِ تورک۔ وزیراعظم عمران خان پاکستان ءِ ریاست مدینہ نا وڑآ حقی آسودہی ریاست اس جوڑ کننگ نا خواہندار ءِ۔ اپوزیشن ءِ دا ملک اٹی غٹ جمہوری و سیاسی آجوئی دوئی ءِ۔ ختم نبوت کن کنے آن زیات کس اس قربانی تتنے۔ کانود نا دنگ اٹ ہر کس ءِ برانز کننگ نا حق ارے ولے کانود ءِ دوٹی ہلوک آتے کانود تینا دوٹی ہلیک۔ داکان مست وزیرداخلہ پولیس لائنز اٹی ایئرپٹرول یونٹ نا پاسنگ آؤٹ پریڈ نامعائنہ ءِ کرے۔
