اسلام آباد۔ 21 اکتوبر (اے پی پی) اسپیکر قومی اسمبلی اسد قیصر پارینے کہ پاکستان بحرین تون تینا تعلقداری تے اہمیت ایتک و السی و اقتصادی رابطہ غاتا مون آ دننگ نا کمک اٹ ہڑتوم آ کنڈآتا تعلقداری تے پین ودفنگ نا خواہندار ءِ۔ اوپارے کہ ہڑتوم آ ملک آک مذہب، دودوربیدگ و تاریخ نا اسیجائی قدر انا خواجہ ءُ ہرا اقتصادی کمکاریءِ مون آ دننگ اٹ اہم ءُ کڑد اس ادا کننگ کیرہ۔ اوداخیال آتا درشانی ءِ پنچ شنبے نادے آ اسلام آباد اٹی بحرین نا سفیر محمد ابرہیم محمد عبدالقادر تون مروک آ اوڑدہی ٹی گپ وتران کرسا کرے۔ اسپیکر اسد قیصر پاکستان و بحرین نا نیام اٹ پارلیمانی کہول آ خوشگوار تعلقداری آ است جمی نا درشانی ءِ کرسا پارے کہ ہڑتوم آ اسلامی برادر ملک آتا پارلیمان نا باسک آک ہڑتوم آ کنڈآتا تعلقداری تے پین سوگو کننگ اٹ بھاز اہمیت تخرہ۔ اوبحرین نا نمائندہ غاتا کونسل نا اسپیکر نا نومبر اٹی گمانی دورہ پاکستان ءِ پارلیمانی رابطہ غاتا مون آ دننگ اٹ اہم ءُ مزل نا نشان اس گوندا وہڑتوم آ ملک آتا باسک آتا ڈل آتا ہن وبر نا گرج آ زورشاغا۔ اسپیکر اسد قیصر پارے کہ پاکستان بحرین تون واپار و زرکاری ءِ مون آ دننگ نا خواہندار ءِ۔ اوپارے کہ ہڑتوم آ ملک آتا نیام اٹ مروک آ وارخواہی تا نسبت ہڑتوم آ کنڈآتا واپاری کچ بھاز کم ءِ ہراٹی ہڑتوم آ ملک آتا چیمبرز آف کامرس نا نیام اٹ رابطہ غاتے مون آ دننگ نا گرج ءِ۔ اوپارے کہ پاکستان اٹی گچین کسبکار افرادی قوت ارے ہراٹی ہیلتھ پروفیشنلز ، انجینئرز ، بزنس منیجرز و آئی ٹی چاہندارآک اوار ءُ، بحرین داکسبکاری افرادی قوت آن فائدہ دوئی کننگ خواہک۔ اوسفیر ءِ بحرین اٹ ساڑی پاکستانی پردیسی تے ہرممکن آسراتی فراوان کننگ کن ہم پارے۔ اوپارے کہ ساڑی حکومت پاکستان اٹ زرکاردوست پالیسی درستی راستی کرفینے ہرافتیان بحرین نا زرکارفرمز آک فائدہ ہرفنگ کیرہ۔ بحرین نا سفیر محمد ابراھیم محمد عبدالقادر پارے کہ پاکستان ڈیہہ نا اہم ءُ ملک اسے و بحرین پاکستان تون تینا دوستانہ و برادرانہ تعلقداری تے قدر انا نظراٹ ہرک و اوفتا حکومت اقتصادی و السی کہول آ رابطہ غاتے مون آ درسا ہڑتوم آ کنڈآتا تعلقداری تے پین ودفنگ خواہک۔ اوپارلیمانی رابطہ غاتے ٹی ودکی نا اسپیکر نا سلاہ آن امنا کرسا پارے کہ ہڑتوم آ ملک آتا پارلیمنٹ نا باسک آک ہڑتوم آ قوم تے خڑک اتنگ اٹ اہم ءُ کڑد اس ادا کننگ کیرہ۔ اوڈیہہ ٹی پائیدار امن نا قیام و سیوت بین المسلمین نا مون آ دننگ کن پاکستان نا کوشست آتا ستاءِ کرے۔ اوپارے کہ بھلو کچ اسے ٹی پاکستانی پردیسیک بحرین اٹ رہینگ انگ ءُ ہرا بحرین نا شونداری و شونہالی ٹی اہم ءُ کڑد اس ادا کننگ ءُ۔ اوپارے کہ بحرین پاکستان آن پین کسبکار افرادی قوت نا خذمت دوئی کننگ اٹ بھاز است خواہی تخک۔
