اقوام متحدہ۔ 21 اکتوبر (اے پی پی) پاکستان اقوام متحدہ نا نوآبادیات نا چٹفنگ نا بارواٹ کمیٹی و سلامتی کونسل آن جموں و کشمیر آ بھارتی نوآبادیات نا چٹفنگ کن گام گیج کننگ و ہموجاگہ نا مخلوق ءِ اوفتا حق خودارادیت نا کاریم اٹ اتنگ نا قابل جوڑ کننگ نا خواست کرینے۔ اقوام متحدہ ٹی پاکستان نا آخبتی مندوب منیر اکرم جنرل اسمبلی نا نوآبادیات نا چٹفنگ نا بارواٹ خصوصی سیاسی(چارمیکو) کمیٹی آن تران کرسا زور شاغا کہ نوآبادیات نا چٹفنگ اقوام متحدہ نا بے پورو ایجنڈا نا بشخ ءِ۔ منیر اکرم نا کمیٹی آن تران آن پد پاکستان و بھارت نا سفارتی نمائندہ غاتے ٹی زبانی جھیڑہ اس ہم مس۔ اوپارے کہ جموں و کشمیر آ بھارتی کوزہ پوسکن آ دور انا نوآبادیات نا بدترین ءُ دروشم اسے۔ اوپارے کہ 1946 آن پد آن 80 مسکوہی نوآبادیات آجوئی دوئی کرینو ولے جموں و کشمیر و فلسطین نا الس داسہ ہم تینا تینا حق خودارادیت آن محروم ءُ۔ اوگونداکہ نوآبادیات نا چٹفنگ نا جاری اعلامیہ ٹی پڑوکننگاسس کہ غٹ مخلوق ءِ حق خودارادیت ملک۔ منیر اکرم پارے کہ جموں و کشمیر نا حالیت اٹ داحق خودارادیت ءِ اقوام متحدہ نا سلامتی کونسل نا قرارداد آتا کمک اٹ پین تقدس تننگا ہراکہ دا حتمی تصفیہ نا خواست ءِ کیک کہ ریاست نا فیصلہ اقوام متحدہ نا کنڈآن مروک آ آجو و منصفانہ رائے شماری نا کمک اٹ مرے۔ ولے کشمیر اینو دنیا نا غٹ آن گنجان مقبوضہ و غیرکانودی کوزہ گیرعلاقہ ءِ ہراڑے 9 لکھ بھارتی فوجی تعینات ءِ۔ اومستی پارے کہ مچ آ کشمیری سرکڑدہ غاتے بند کننگانے، ہزار آ کشمیری ورنابشمول زالبول و چناتے دزگیر کننگا، برانز پرتشدد وڑاٹ ماڑی و خلق آتے اجتماعی سزا نا وڑاٹ بھس کننگا۔ اوپارے کہ بھارت انٹرنیٹ ومقبوضہ کشمیر اٹی بے کنڈہلوک مبصرین آتا داخلہ ءِ بند کرینے۔ اوپارے کہ پنی آ کشمیری راہشون سید علی شاہ گیلانی نا میت ءِ اونا خاہوت آن پلسا نادرست ءُ جاگہ سے آ جہہ جاگہ کننگا، ہراڑآن اونا خاہوت آن اوفتا اسلامی تدفین نا حق ءِ ہم پلنگا۔ دانئے بیرہ بھارتی ظلم و بربریت ءِ ہُننگ نا اسہ کچ اسے بلکن داڑآن کشمیری الس نا آجو توار نا بھارت آ خوف ہم ظاہر مریک۔
