اسلام آباد۔ 20 اکتوبر (اے پی پی) وزیراعظم عمران خان پاکستان ءِ ریاست مدینہ نا وڑآ آسودہی مملکت اس جوڑ کننگ کن جہد ءِ برجاتخنگ نا عزم ءِ ظاہر کرسا غریب آتا خیالداری، انصاف نا بالادستی ، بڑزکو اخلاقی قدر، وڈی خوری نا توننگ و خاہوتی نظام نا رکھ آ زور شاغانے، اسلامی قدر آ عملدرآمد آن بیدس راج شون ہلنگ کپک، لغور انگا انسان اسُل لیڈر جوڑ مننگ کپک، ہراتم اسکان زندہ اُٹ انصاف وکانود نا بالادستی کن جنگ ترسا کیوہ، انصاف نا اسہ وڑ آب ءِ تینا کننگ آن بیدس اسہ راج اس ہم شون ہلنگ کپک، ورناتے رحمت اللعالمین اسکالر شپ تننگ اُن، احساس پروگرام نا رداٹ سواکروڑ مخلوق ءِ بروک آ تُو زرتننگک، پنجاب اٹی مارچ اسکان غٹ شاری تے ہیلتھ کارڈ ملک، حکومت مخلوق و دنیا ءِ خواجہ محمد خاتم النبین صلی اللہ علیہ و آلہ وسلم نا حیات طیبہ و رغاموک آتیان معلومدار کننگ کن رحمت اللعالمین اتھارٹی اس جوڑ کرین، دا اتھارٹی دنیا ءِ اسلامی انقلاب آن روشناس کرفک و سیرت نبوی نا بارواٹ ورناتا راہشونی ءِ کیک۔ داخیال آتا درشانی ءِ او قومی رحمت اللعالمین صلی اللہ علیہ و آلہ وسلم کانفرنس آن تران کرسا کرے۔ دود اٹی صدر مملکت ڈاکٹر عارف علوی ، بنجائی وزیر آک، وزیر مملکت آک ، قومی اسمبلی نا باسک آتون اوار بڑزکو سیاسی و راجی شخصیت آک بشخ ہلکر۔ وزیراعظم عمران خان پارے کہ جشن عید میلا دالنبی صلی اللہ علیہ و آلہ وسلم ءِ پبی وڑاٹ اڈتننگ آ غٹ ءِ خراج تحسین پیش کیوہ، ننا ورناچین ءِ تینا پیارا نبی نا سیرت نا بارواٹ معلوم مرے، رسول پاک صلی اللہ علیہ و آلہ وسلم نا زند انا بارواٹی خاص وڑاٹ 5 منٹ انا دستاویزی فلم اس جوڑ کرفین، کانفرنس اٹی رسول پاک صلی اللہ علیہ و آلہ وسلم نا سیرت مبارکہ نا بارواٹ خصوصی دستاویزی فلم ءِ نشان تننگا۔ اوپارے کہ رسول پاک صلی اللہ علیہ و آلہ وسلم دنیا ٹی تلوار نا کمک اٹ آخا بلکن تینا سوچ و فکر آن انقلاب ایسوسس، ریاست مدینہ نئے بیرہ مسلمان بلکن ہر مہذب راج اکن بے مٹ ءُ وڑاس جوڑ مس، رسول پاک صلی اللہ علیہ و آلہ وسلم راج اٹ جوان خراب نا تمیز ءِ تخا و اخلاقی آب ءِ بڑز کرے، ننا خواجہ صلی اللہ علیہ و آلہ وسلم تینا سیرت مبارکہ نا کمک اٹ انصاف نا درس تس، مسلمان بڑزکو اخلاقیات، ایمانداری و سچائی نا علمبردار ئسر، عدل و انصاف و کانودنا حکمرانی ئس، کانود آن ہچ گہس ایڑتر الوکہ۔ اوپارے کہ ہموقوم کانود نا حکمرانی ءِ قائم کننگ کیک ہرا بڑزکو اخلاق نا حامل مرے، او ملک ءِ بنانا ری پبلک پاننگک ہراڑے کانود مف، نزور ءِ انصاف ملپ، بنانا ری پبلک اٹ جنگل نا کانود مریک، بناناری پبلک وسیلہ غاتا کمتی آن آخا کانود و انصاف نا عدم فراوانی نا سوب مریک۔ اوپارے کہ بڑزکو اخلاق و انصاف پسند ملک آک شون ہلکر۔ اوپارے کہ ریاست مدینہ آسودہی ءُ ریاست اس ئس، داریاست شیفکو تپہ نا زمواری تے ہلک و اوفتے بڑزاہرفے، ہراتم ریاست مخلوق نا بنداوی گرج آتے پورو کیک تو مخلوق سہی مریک، انسانیت و انصاف آن قوم سوگو مریک۔ اوپارے کہ ہندوستان اٹی کانود نا آخا واک انا حکمرانی ئس، اوغانستان و ننا قبائلی علاقہ غاتے ٹی جرگہ نا نظام ئس، داحالیت آتے ٹی ہندوستان آ کوزہ کننگاکہ ولے اوغانستان آ کوزہ کننگ متو، قبائلیک برطانوی راج انا برخلاف پدریسہ جنگ کریر۔ وزیراعظم پارے کہ ریاست مدینہ مخلوق ءِ انصاف و بنداوی آسراتی فراوان کرے، ہموڑے میرٹ نا بالادستی ئس۔ اوپارے کہ لیڈر صادق و امین مرے، ہرا ایماندار، سچا و انصاف پسند مفک اونا ہچ ءُ عزت مفک، صادق و امین مننگ آ عزت مریک، خواجہ محمد صلی اللہ علیہ و آلہ وسلم بے مٹ ءُ وڑاس پیش کرسا مسلمان تیٹی قائدانہ خصوصیت ودی کرے، او بہادر سرکڑدہ اس ئس، اسلام پارے کہ زند، عزت و رزق اللہ نا دوٹی ءِ ہراڑآن اوفتا خوف چٹا و کم وخت اٹی بھلو مسلمان لیڈر ودی مس ہرافک دنیا نا کماشی ءِ کریر۔ وزیراعظم پارے کہ اسلام زالبول آتے اوفتا حق تس، یورپ کیہی سد سال آن پد دا حق آتے زالبول آتے تس، اسلام اٹی غلام تا راج انا بشخ جوڑ کننگا، غلام بادشاہ جوڑ مس، غلام تے داوڑنا رتبہ تننگ نا پین ہچ ءُ درور اس ملیپک، اسلام بزرگ آتا شرف ءِ ہیل تس، اولیکو وار ریاست مدینہ ٹی پنشن نا نظام نا بناءِ کننگا، حضرت بابافرید گنج شکر، نظام الدین اولیاء تون اوار بزرگان دین عاشق رسول ئسر، لکھ آ مخلوق دا بزرگان دین تتون پیارکیرہ، ہراسٹ خواجہ محمد صلی اللہ علیہ و آلہ وسلم نا اسوہ حسنہ نا پیروی ءِ کرے و سرسہب مس۔ وزیراعظم پارے کہ اسلام نا سوب آن علم انا انقلاب بس، مسلمانک سائنس تون اوار غٹ بشخ آتے ٹی راہشونی کریر، بغداد و قرطبہ علم انا ہند جوڑ مسر، خواجہ محمد صلی اللہ علیہ و آلہ وسلم رحمت اللعالمین ءِ، اوغٹ انسان تیکن رحمت مرسا بس، مسلمان نبوی نا رغاموک آتیا عمل کرسا سرسہبی دوئی کننگ کیرہ۔ عمران خان پارے کہ برطانیہ ٹی انسانیت خنان، نیزگارآتیکن مفت درمان، چناتا مفت تعلیم و عدالت اٹ کانودی امداد مفت ملک۔ اوپارے کہ پانامہ کیس اٹ دروغ تڑنگا، قطری چٹھی بس، ولداکیلبری فونٹ بس، 2007ء ٹی کیلبری فونٹ بس ولے او 2006نا نشان تسر، داڑے سوغند ہرفسا دروغ تڑنگک، انصاف کننگ کن اخلاقی جیرت مرے، لغور آ انسان اسُل لیڈر جوڑ مننگ کپک۔ اوپارے کہ ننا پارلیمانی نظام ہم دیکی آنبار ءِ ولے پارلیمانی جمہوریت اخلاقی بنداو تیا ہی سرسہب مننگ کیک، دامنہ ملک آن بیدس اسہ جاگہ اس ہم سرسہب متو، ہموڑے چھانگامانگا نا سیاست مفک، داڑے غٹ ءِ سماءِ کہ سینیٹ گچین کاری ٹی پیسہ چلینگک ہمیڑے داوڑ مفک، ہمیڑے کس اسے آ الس نا پیسہ غاتا دُزی نا دوبہ لگے تو اونا پارلیمنٹ نا باسک جوڑ مننگ تو مرانا ہیت اسے و میڈیا غاہم بننگ کپک۔ اوپارے کہ خواجہ محمد صلی اللہ علیہ و آلہ وسلم نا اسوہ حسنہ ننکن بے مٹ ءُ وڑاسے، ننے و ننا ورناتے اوڑآ عمل کیر ، اللہ تعالیٰ نا پرمان ءِ کہ ہراداڑآ عمل کرے او سرسہب مریک۔ وزیراعظم پارے کہ کانود نا بالادستی نا جنگ ءِ کٹنگ غٹ آن بھلا جنگ ءِ، ہراتم اسکان دا جنگ ءِ کٹپنہ ہموتم اسکان ملک اٹی جمہوریت و شونہالی بفک۔ اوپارے کہ پیشن نا ملک پاکستانیک وطن آ پدی برسا زرکاری نااست خواہی تخرہ ولے ہراتم او وطن آ پدی بریرہ تو اوفتے تون درو و فراڈ مریک ہرانا سوب آن او داڑے رہینگ انگ کپسہ، اوکانود نا حکمرانی نا عادتی مریرہ، 90 لکھ پاکستانی پیشن نا ملک آتے ٹی رہینگ انگ ءُ، اگہ 30 آن 40 ہزار پاکستانی وطن آ پدی برسا زرکاری کیر تو آئی ایم ایف آ ہِننگ نا ضروت تمپ، اوفتاپاکسان اٹی زرکاری ٹی ملک انا نظام بھلو اڑاند اسے، اوٹی گچینی اتنگ کن کوشست کننگ اُن۔
