اسلام آباد۔ 20 اکتوبر (اے پی پی) صدر مملکت ڈاکٹر عارف علوی پارینے کہ خواجہ محمد صلی اللہ علیہ و آلہ وسلم نا حیات طیبہ ننے زند انا ہرپڑاٹ راہشونی فراوان کیک، راجی ویل آتا مون ءِ توننگ و قوم انا اخلاقی تربیت کن ننے خواجہ صلی اللہ علیہ و آلہ وسلم نا رغاموک آتے کسرنا ڈیوا جوڑ کروئی مریک، نبی آخرالزمان صلی اللہ علیہ و آلہ وسلم نرم گو و گچین ءُ معلم اس ئس ہرا سیوت و سخا، انسانی شرف، کانود نا بالادستی ، انصاف، بریبری و اخلاقیات نا سبخ تس، مسجد نبوی صلی اللہ علیہ و آلہ وسلم آن اسہ جہانی ءُ انقلاب اس بناکرے و دنیائے اسلام و پاکستان اٹی حقی ءُ بدلی اس اتنگ کن مسجد و محراب ءِ بنداوی کڑد ادا کروئی مریک۔ صدر مملکت داخیال آتا درشانی ءِ ایوان صدر اٹی اِرادے ئی قومی رحمت اللعالمین صلی اللہ علیہ و آلہ وسلم کانفرنس آن تران کرسا کرے۔ کانفرنس نا سرحال ’’ اتحاد و اتفاق کن مسیت، مدرسہ، خانقاہ و امام بارگاہ تا کڑد‘‘ ئس۔ کانفرنس آن بنجائی وزیر مذہبی امور و بین المذاہب ہم آہنگی پیر محمد نورالحق قادری، چیئرمین اسلامی نظریاتی کونسل ڈاکٹر قبلہ ایاز ، وزیراعظم نا خصوصی نمائندہ مذہبی ہم آہنگی و دے ٹکی نیامی علامہ طاہر محمود اشرفی، بنجائی سیکرٹری مذہبی امور سردار اعجاز احمد خان جعفر، صاحبزادہ سلطان احمد علی باہو، مولانا ضیاء اللہ شاہ بخاری، علامہ عارف حسین واحدی و نگہت ہاشمی ئسک ہم تران کریر۔ کانفرنس اٹی بنجائی وزیر سید شبلی فراز و علی محمد خان آن بیدس وزیراعظم نا خصوصی کمکار چاگڑدی بدلی ملک امین اسلم و آفتاب جہانگیر آن بیدس پارلیمان نا باسک آک، صوبائی اسمبلی نا باسک آک، مچ آ ملک آن تروک آ جید عالم دین و مشائخ عظام و مخلوق نا اسہ بھلو کچ اس بشخ ہلکر۔ صدر مملکت کانفرنس آن تران کرسا پارے کہ سنت نبوی صلی اللہ علیہ و آلہ وسلم ننے زند انا ہر بشخ اٹی راہشونی فراوان کیک، خواجہ صلی اللہ علیہ و آلہ وسلم نا زند اٹی مسجد نبوی صلی اللہ علیہ و آلہ وسلم ریاست مدینہ نا غٹ سرجزآتا مرکز ئس، مسجد نبوی صلی اللہ علیہ و آلہ وسلم عدالت ، درسگاہ و عبادت گاہ نا ہم کڑد ءِ ادا کرے۔ اوپارے کہ ملکی شونداری و شونہالی ، سیوت و اسٹی و قوم انا اخلاقی تربیت کن اسکول، مسیت ومنبر ، میڈیا و خاہوت نا ادارہ غاتے سوگو کروئی مریک و دا ادارہ غاتا کمک اٹ قوم انا ورناتااخلاقی تربیت کروئی مریک۔ ڈاکٹر عارف علوی پارے کہ پچار کننگ نا مون ءِ توننگ کن میڈیا و راج انا غٹ بندغ آتے زمواری نا احساس کروئی مریک تانکہ داراجی برائی تے توننگ مرے۔ اوپارے کہ صدارت نا منصب ءِ سنبھالنگ آن پد اسلامی نظریاتی کونسل و وزارت مذہبی امور ءِ چٹھی ٹی قوم انا اخلاقی تربیت کن تینا کڑد ءِ ادا کننگ کن پارینٹ۔
