اسلام آباد۔ 20 اکتوبر (اے پی پی) پارلیمانی سیکرٹری جان جوڑی ڈاکٹر نوشین حامد پارینے کہ ملک اٹی کروڑ آتا کچ اٹی مخلوق ءِ کورونا ویکسین نا اولیکو ڈوز خلنگ نا عمل پورو مسنے، حکومت الس کن ویکسی نیشن نا عمل ءِ آسان و رسینگ نا قابل کننگ کن چندی گام گیج آتے کننگ ءِ۔ نجی ٹی وی چینل تون گپ وتران کرسا او پارے کہ اسکول آتے ٹی 12 سال آن زیات وئی نا چناتے ویکسین خلنگ نا عمل بناکرینے و داچرجوئی ٹی طالب علم آتا ولمہ و باوہ غاک ہم ویکسی نیشن کروک آ ٹیم آتون کمک کننگ ءُ تانکہ زوت آن زوت دادین آن جان ءِ خلاس کننگ مرے۔ ڈاکٹر نوشین حامد پارے کہ فائزر ویکسین 18 سا ل آن کم وئی نا چناتے خلنگک۔ اوالس آ زور شاغاکہ زوت آن زوت تینا ویکسی نیشن ءِ پورو کرفر انتئے کہ کورونا دین آن نجات دوئی کننگ نا ہندا اسٹ انگا ایسر ءِ ، ہرشاری کن المی ءِ کہ تینے دین آن رکھ تخنگ کن رکھی گام گیج اختیار کے۔
