اسلام آباد۔ 20 اکتوبر (اے پی پی) بنجائی وزیر حوالکاری و شینکاری چوہدری فواد حسین پارینے کہ خواجہ حضرت محمد صلی اللہ علیہ و آلہ وسلم نا سیرت ننکن کسر نا ڈیواءِ، خواجہ صلی اللہ علیہ و آلہ وسلم نا اسوہ حسنہ غا عمل ہی دنیا و آخرت اٹی سرسہبی نا ضامن ءِ، اینو پاکستان ءِ ریاست مدینہ نا وڑآ کننگ نا مسخت تینا رہبر و پیغمبر نا صفت و اسوہ حسنہ غاعملدرآمد نا کوشست ءِ۔ او12 ربیع الاول یوم ولادت رسول صلی اللہ علیہ و آلہ وسلم نا وخت آ تینا کلہو اٹی پارے کہ ننا کوشست ءِ کہ نن ریاست مدینہ نا تصور آن پورو وڑاٹ راہشونی دوئی کرسا وطن عزیز ءِ اسہ آسودہی ریاست اسے نا سانچہ ٹی شاغن، داسہ مزل زیات مراف ، بھاز زوت دانا مثبت اثرمرتب مریک۔ بنجائی وزیر حوالکاری پارے کہ ننے اسوہ حسنہ غان راہشونی ہلسا راج اٹ امن و ایلمی نا مون آ دننگ و فلاح انسانیت کن کاریم کروئی مریک۔ چوہدری فواد حسین پارے کہ خاتم النبین نا حیات طیبہ نئے بیرہ مسلمان بلکن غٹ انسانیت نا سیرت و کڑد انا تعمیر و اخلاق و اعمال نا درستگی نا عمدہ ءُ درور اسے۔ اوپارے کہ خواجہ نبی کریم صلی اللہ علیہ و آلہ وسلم نا رغاموک آتیا عمل کرسا ننے قومی،مذہبی و اجتماعی فائدہ غاتے مون آ تخسا تینا سوچ و رویہ غاتے ٹی بدلی اتوئی مریک۔ اونا پاننگ ئس کہ ساڑی آ دور انا خواست ءِ کہ نن عشق محمد صلی اللہ علیہ و آلہ وسلم ءِ تینا کڑد، گفتار و عملی نمونہ غان دنیا غا ثابت کین۔ اودعاکرے کہ ماہ ربیع الاول ننکن رحمت نا سوب و بخشش مرے واللہ تعالیٰ ننے محسن انسانیت خواجہ نبی کریم صلی اللہ علیہ و آلہ وسلم نا اسوہ حسنہ غا عمل کننگ نا توفیق عطاکے و وطن عزیز ءِ حقی شونداری و شونہالی نا کنڈآ دین۔
