اسلام آباد۔ 20 اکتوبر (اے پی پی) پاکستان تحریک انصاف (پی ٹی آئی ) نا راہشون و قومی اسمبلی نا باسک صداقت علی عباسی پارینے کہ کورونا دین انا سوب آن داوخت آ مچ آ دنیا نا زرگزرانی حالیت آک خراب ءُ، و کبینی نا طوفان بسنے، اپوزیشن سیاسی پوائنٹ سکورننگ کن غوغا کننگ ءِ، پاکستان اٹ ساڑی آ کبینی مسکوہی حکمران تا کرپشن و کورونا نا اثرآتا سوب آن ءِ، ساڑی حکومت کبینی نا مون ءِ توننگ و الس ءِ زیات آن زیات ریلیف تننگ کن پبی گام گیج کننگ ءِ۔ نجی ٹی وی چینل تون گپ وتران کرسا اوپارے کہ مسکوہی حکمرانک تینا حکومت نا دور تیٹی الس و ملک انا گچینی کن کاریم کننگ نا جاگہ غا بھلو کچ اسے آ کرپشن و منی لانڈرنگ اٹ اوار ئسر، نواز شریف اینو پگہ لندن اٹ ایون فیلڈ ماڑی ٹی عیش و عشرت نا زند ءِ تیر کننگ ءِ۔ صداقت عباسی پارے کہ نواز شریف سزاکنوک ءُ ڈوہدار اسے و ملک آن نرانے، لیگی راہشون تے مرے کہ تینا قائد ءِ پدی بٹنگر تانکہ او عدالت آتیٹی تینا وڈی خوری نا کیس آتون مون ایتے۔ صداقت علی عباسی پارے کہ کبینی و ویل آتیان پد ہم پی ٹی آئی نا ووٹر آک وخت اس ہم پارٹی ءِ ہلسا ن لیگ و پیپلزپارٹی ءِ وونٹ تفسہ، پیپلزپارٹی و ن لیگ الس اٹ نفرت نا نشانہ جوڑ مسنو۔ اوپارے کہ مسکوہی حکومت آک وام ہلسا ملک اٹی ہندن ءُ ڈٹ و ڈول خلکر ہراڑآن اوفک کک بیکس و کمیشن ہلکر، ساڑی حکومت قوم انا خراج نا پیسہ غاتے الس نا راجی آسراتی و ملک انا شونداری نا ڈٹ آتیا خڑچ کننگ ءِ۔
