راولپنڈی۔19اکتوبر (اے پی پی): مزن وزیر عمران خان ءَ پاکستان ءَ را ریاست ءِ مدینہ ءِ نمونگ ءَ گہبودی مملکت ءِ جوڑ کنگ ءِ واستہ جہد ءُ کوشست کنگ ءِ جزم ءَ درشان کنان ءَ گریب آنی چار ءُ گزار ، انصاف ءِ سروکی، برز ءُ بلندیں اخلاق، کرپشن ءِ گر ءُ داسر ءُ ھاندانی نظام ءِ رکھینگ ءِ سر ءَ زور پر داتگ، اسلامی شرپ ءُ ازت ءِ پد ءُ رندی ءَ ابید چاگرد ءِ دیمروئی بوت نہ کنت، بزدل بنی آدم اچبر لیڈر جوڑ بوت نہ کنت، تاں وھد ءِ زندگ آں انصاف ءُ کانود ءِ سروکی ءِ واستہ جنگ کناں، انصاف ءِ ھمکچیں کد ءُ بالاد ءَ را وےتی کنگل ءَ ابید اچ چاگرد دیمروئی کت نہ کنت، ورنا آناں رحمت للعالمیں سکالرشپس دیگ ءَ آں، احساس پروگرام ءِ چیر دستی ءَ یک کروڑ پانزدھ لکھ مردم آناں آیوکیں ماہ ءَ زر دیگ بیت، پنجاپ ءَ مارچ ءَ تاں درستیں شہری الس آناں ہیلتھ کارٹ دیگ بیت، حکومت ءَ مردم ءُ دگنیا ءَ را نبی کریم خاتم النبین ﷺ ءِ زندمان ءُ زانشت ءَ گوں سئیگ ءُ سرپد کنگ ءِ وساتہ رحمت اللعالمین اتھارٹی جوڑ کتگ، اے اتھارٹی دگنیا ءَ را اسلامی آشوپ ءَ گوں سرپد کنت ءُ سیرت نبوی ﷺ ءِ بابت ءَ ورنا آنی سروکی ءَ کنت۔ اے ھیالانی درشانی آئی ءَ سئے شمبے ءِ روچ ءَ راجی رحمت اللعالمیں ﷺ کانفرنس ءَ گوں گشتانک دیان ءَ کت۔ مراگش ءَ صدر ءِ مملکت ڈاکٹر عارف علوی، بنجاھی وزیر ، وزیر ءِ مملکت، راجی اسمبلی ءِ باسک آں ھوار سیاسی ءُ چاگردی سروک آں بھر زوری کت۔ مزن وزیر عمران خان ءَ گوشت کہ جشن عید میلا النبی ﷺ ءَ را گوں جوانی ءَ برجم دارگ ءِ پد ءَ توامیں مردم آناں توسیپ ءُ ستا پیش کناں، آئی ءَ گوشت کہ ورنا آناں وتی پاکیں نبی ﷺ ءِ بابت ءَ سھیگ ءُ سرپد بوھگ لوٹ ایت۔
