اسلام آباد۔19اکتوبر (اے پی پی):صدر مملکت ڈاکٹر عارف علوی ءَ گوشت کہ نبی کریم ﷺ ءِ زندمان مارا زندمان ءِ ھمک پڑ ءَ سروکی ءُ رھشونی پجاری کنت، چاگردی جیڈھ آنی گر ءُ دار ءُ راج ءِ اخلاقی ھیل کاری ءِ واستہ مارا نبی کریم ﷺ ءِ زانشت آناں وتی کشک جوڑ کنگی انت، نبی آخر الزمان ﷺ لہم گوش ءُ بے دروریں رھشون ءِ بوتگ، آئی ءَ یکوئی ءُ تپاکی، بنی آدمی شرپ، کانود ءِ سروکی ، انصاف ، ھمکچی ءُ اخلاقیات ءِ درسد داتگ، مسجد ءِ نبوی ﷺ ءَ چہ میاں اوستمانی آشوب ءِ بنگیج بوتگ ءُ اسلامی دگنیا ءُ پاکستانی ءَ گواچنی مٹ ءُ بدلی آرگ ءِ واستہ مسجد ءُ محراب ءِ بنیاتی کرد ءَ را پیلو کنگ لوٹ ایت۔ صدر ءِ مملکت ءَ اے ھیالانی درشانی آئی ءَ سئے شمبے ءِ روچ ءَ ادا ایوان صدر ءَ دو روچی راجی رحمت اللعالمیں ﷺ کانفرنس ءَ گوں گشتانک دیان ءَ کت۔ کانفرنس ءِ بن گپ ” یکوئی ءُ تپاکی ءِ واستہ مسیت، مدرسہ، خانقاہ ءُ امام بارگاہ آنی کرد ” ات۔ کانفرنس ءَ گوں بنجاھی وزیر نیک راھی کار ءُ ایندگر نیک راھ آں گوں وت مہ وتی گیش کنوک پیر محمد نور الحق قادری، چیئرمین اسلامی نظریاتی کونسل ڈاکٹر قبلہ ایاز، مزن وزیر ءِ نماھندگ ھاسیں برائے نیک راھی کار ءُ روبرکت علامہ طاہر محمود اشرفی، بنجاھی سیکرٹری نیک راھی کار سردار اعجاز احمد خان جعفر، صاحبزادہ سلطان احمد علی باہو، مولانا ضیاء اللہ شاہ بخاری، علامہ عارف حسین واحدی ءُ نگہت ہاشمی ءَ ھم گشتانک دات۔ کانفرنس ءَ بنجاھی وزیر سید شبلی فراز ءُ علی محمد خان ءَ ابید وزیر ءِ ھاسیں کمکار برائے ماحولیات ملک امین اسلم ءُ آفتاب جہانگیر ءَ ابید پارلیمنٹ ءِ باسک ءُ صوبائی اسمبلی آنی باسک آں ھوار ملک ءِ نامداریں مُلا ءُ زانت ءُ شاہزانت ساڑی اتنت۔
