کوئٹہ۔ 18 اکتوبر (اے پی پی) وزیراعلیٰ بلوچستان جام کمال خان نا کماشی ٹی گوادر اٹی بڑزکو کہولی دیوان اس اڈ ہلک۔ دیوان اٹی صوبائی وزیر صنعت و حرفت محمد خان طور اتمان خیل، کمشنر ڈویژن مکران شاہ عرفان غرشین، ڈپٹی کمشنر گوادر میجر ریٹائرڈ عبدالکبیر خان ، ایکسین پی ایچ ای راحیل بگٹی محکمہ روڈ و بلڈنگ کمامدار آتون اوار ایلو بڑزکو کمامدار آک بشخ ہلکر۔ دیوان ءِ ڈائریکٹر جنرل ادارہ شونداری گوادر نا کنڈآن گوادر اٹی کنوئی آ دیر انا فراوانی، ادارہ شونداری گوادر نا چاروکی ٹی برجا شونداری ڈٹ، ساڑی آ پِر تیان سوڈیم و شادی کور ڈیم اٹی دیر انا کچ اٹی ودکی، آنکار کور ٹی ہم پِر تیان ڈیم پُرمننگ دا ڈیم آن پشکان و گنز جیوانی نا علاقہ ءِ دیر فراوان کننگ نا بابت حوال تننگا۔ دیوان ءِ پاننگاکہ سوڈڈیم و شادی کور ڈیم آن گوادر اسکان دیر انا پیپ لین تا خلنگ آن پد گوادر ءِ دیر انا فراوانی بناکرینے۔، دیوان اٹی گوادر اولڈ سٹی نا ٹاؤن پلاننگ، نکاسی آب، سڑک آتا پکائی و دیر انا فراوانی نا چندی ڈٹ آتیا کاریم نا پیش رفت نا جاچ ءِ ہم ہلنگا۔ دیوان آن تران کرسا وزیراعلیٰ پارت کرے کہ گوادر شار اٹی نکاسی آب و مخلوق ءِ کنوئی آ ساف دیر انا فراوانی ءِ اولیت آتے اوار کننگے۔ وزیراعلیٰ نا کنڈآن دیوان اٹی گوادر اولڈ سٹی نا ویل آتیا سجفنگ و گوادر اولڈ سٹی ٹی بنداوی آسراتی تا فراوانیءِ پک کننگ نا پارت ہم کننگا۔ وزیراعلیٰ پارت کرے کہ گوادر جنت بازار و شاہی بازار ءِ پوسکن آ وڑوڈول آتیا کرسا حقی روپ اٹ اتنگے و گوادر اٹی غٹ ڈٹ آتیا زوت عملدرآمد ءِ پک کننگے۔ دیوان اٹی ایم ڈی جیڈا عطاء اللہ جیڈا نا شونداری ڈٹ آتا بابت ہم حوال تس۔ اوکان پد وزیراعلیٰ ب بلوچستان جام کمال خان ضلعی ہیڈکوارٹر ہسپتال نا تفنگوک آ ماڑی نا ہم دورہ ءِ کرے۔ داوخت آ صوبائی وزیر حاجی محمد خان طور اتمان خیل، کمشنر مکران شاہ عرفان غرشین و ایلو کمامدارآک ہم وزیراعلیٰ تون اوار ئسر۔ وزیراعلیٰ ہسپتال نا زیر تعمیر ماڑی نا چندی بشخ آتا معائنہ ءِ کرے و تعمیراتی کاریم نا رفتار ءِ ترند و وخت آ پورو کننگ نا پارت کرے۔ وزیراعلیٰ گوادرہ دورہ نا وخت آ جنت بازار نا دورہ ءِ ہم کرے ۔ وزیراعلیٰ داوخت آ جنت بازار ءِ کشادہ کننگ نا پارت ہم کرے ۔ وزیراعلیٰ بازار نا دورہ نا وخت آ ہندی دوکاندار تتون ملا و اوفتا ویل آتے بِنگ۔ اوپارے کہ گوادر نا ہندی مخلوق نا شونداری و شونہالی ءِ اولیت ایتنہ۔ حکومت گوادر نا ہندی مخلوق نا ویل آتیان جوانی اٹ بلد ءِ ہرافتا ایسری کن اولیتی بنداو تیا خاطرخواہ گام گیج کننگ انگ ءِ۔