پاکستان اٹی امریکہ ناظم الامور انجیلا ایجلر نا آرمی چیف جنرل قمرجاوید باجوہ تون اوڑدہی

راولپنڈی۔ 18 اکتوبر (اے پی پی) پاکستان اٹی امریکی ناظم الامور انجیلا ایجلر آرمی چیف جنرل قمر جاوید باجوہ تون اوڑدہی کرے۔ اوڑدہی ٹی تین پہ تینی است خواہی نا باندات، اوغانستان نا ساڑی آ سیکورٹی حالیت و چندی بشخ آتے ٹی ہڑتوم آ کنڈآتا کمکاری آ گپ وتران کننگا۔ پاک فوج انا شعبہ تعلقات عامہ نا رداٹ داوخت آ آرمی چیف پارے کہ پاکستان ہڑتوم آ کنڈآتا تعلقداری نا روایت ءِ برقرار تخنگ و امریکہ تون پائیدار تعلقداری تا خواہندار ءِ۔ آرمی چیف انسانی تنکی آن بچنگ و اوغان الس نا زرگزرانی شونداری کن سوگو کوشست آتے کن اوغانستان نا باندات آ جہانی کہول آ یکجا مننگ نا گرج انا ہم درشانیءِ کرے۔ امریکی ناظم الامور اوغان حالیت، علاقائی سوگوی کن پاکستان نا کوشست آتا ستاءِ کرے و پاکستان تون ہرکہول آ سفارتی کمکاری ٹی پین گچینی کن تینا کڑد ءِ ادا کننگ نا عزم ظاہرکرے۔