اسلام آباد۔ 18 اکتوبر(اے پی پی) بنجائی وزیر ڈٹ بندی ، شونداری و اصلاحات اسدعمر پارینے کہ حکومت لس بندغ ءِ ریلیف فراوان کننگ کن ٹارگٹڈ سبسڈیز نا تیاری ءِ پورو کرینے، کبینی ٹی ساڑی آ ودکی بیرہ پاکستان نا آخا جہانی ءُ ویل اسے، دنیا ٹی پٹرولیم مصنوعات آتا نہاد و کبینی پاکستان آن کیہی زیات ءِ، الس ءِ مارچ اسکان کبینی آن ریلیف ملنگ نا گمان ءِ، حکومت پٹرول و ڈیزل آ جی ایس ٹی 17 درسد آن کم کرسا بالترتیب 6.8 و 10.3 درسد کرے، کنوئی آ تیل انا نہاد آتے ٹی منہ دے اٹی 45 آن 50 روپئی فی لیٹر کمتی کینہ، سندھ حکومت خولم دءِ دمدستی ریلیز کے تانیکہ سندھ اٹی نُت انا نہاد آتے ٹی کمتی برے۔ داخیال آتا درشانی ءِ او دوشنبے نادے آ داڑے پریس کانفرنس آن تران کرسا کرے۔ بنجائی وزیر اسد عمر پارے کہ مچ آ دنیا ٹی کبینی نا ذکر مننگ ءِ، مچ آ دنیا ٹی کنوئی آ گڑاتا نہاد آتے ٹی ودکی مسنے۔ اوپارے کہ چار سوج آتے مون آ تخیوہ، کبینی انت اکن مس؟ تدوک آ سال غیر معمولی آفت تون مون تسن، دنیا اسہ دم اتون بند مس، گڑاتا فراوانی زیات ئس، کاریم اٹ اتوک آک کم مسر، نن ہندن ءُ حکمت عملی اس اختیار کرین ہرانا مچ آ دنیا ٹی ستاءِ کننگا۔ اوپارے کہ نن سمارٹ لاک ڈاؤن نا پالیسی ءِ تینا کرین، نن توانائی، ایکسپورٹ انڈسٹری، دوائی جوڑ کروک آ کمپنی و ایلو سیکٹر آتے ملاسن۔ بنجائی وزیرپارے کہ دنیاٹی سخت ءُ پابندی لگا، یورپی یونین، بھارت، چین و ایلو ملک آک زہمی مسر، نظام درہم برہم مس، ہراتم دنیا مست آنبار مس تو کنوئی آ گڑاتا خواست ودا و کاختی مس۔ اوپارے کہ 12 تُو مست ستمبر 2020ءآن ہلیس ستمبر 2021ء نا نسبت دنیا ٹی چندی گڑاتا نہاد آتیا ہرااثرتما اونا لسٹ بس، دنیا ٹی کروڈ آئل اٹی 81.55 درسد ودکی مس وخت اس کہ پاکستان اٹی 55.17 درسد ودکی مس، جہانی دنیا ٹی گیس انا نہاد اٹی 135 درسد ودکی مس وخت اس کہ پاکستان نا ڈومیسٹک گیس انا نہاد اٹی ودکی متو۔ اوپارے کہ بورہ نا نہاد اٹی جہانی منڈی ٹی 53 درسد وخت اس کہ پاکستان اٹی 15 درسد ودکی مس۔ اسد عمر امریکہ، چین وبھارت نا درور ءِ ترسا پارے کہ دا ملک آتے ٹی ریکارڈ کبینی مس ہراڑے کبینی نا کچ انا داخہ در اسُل تصور الوکہ۔ اسد عمر ورلڈ بینک انا ڈیٹا نا حوالہ ءِ ترسا پارے کہ تدوک آ 12 تُو اٹی خام تیل انا نہاد 81.55 درسد وخت اس کہ پاکستان اٹی ہنداوخت اٹی 17.55 درسد نا ودکی مس۔ اوپارے کہ ایل این جی و گیس انا نہاد آتے ٹی 135 درسد ودکی مس، پاکستان اٹی قدرتی ذریعہ اٹ دوئی مروک آ گیس انا نہاد آتے ٹی ہچ ءُ بدلی اس اتنگتو وخت اس کہ ایل این جی نا نہاد اٹی 64 درسد ودکی مس۔
