اسلام آباد۔ 15 اکتوبر (اے پی پی) وزیراعظم عمران خان کشاری پیدوار ءِ ودفنگ کن دیر کوڑی کننگ، پٹ وپول و پوسکن آ ٹیکنالوجی نا کاریم اٹ اتنگ نا گرج آ زور شاغسا پارینے کہ حکومت بزغرآتے اوفتا خواری نا پورو معاوضہ ترفک، چنکا بزغر شونہال مریک تو ملک شونہال مریک، خواری کش و نزور تپہ غاتیا ظلم مننگ کن الیپنہ، ودوک آ آبادی نا گرج آتے پورو کننگ کن کشاری پیدوار اٹی ودکی المی ءِ، کشارگرآتا خذمت ملک انا خذمت ءِ، بزغرکارڈ انا کمک اٹ کشار گر آتے براہ راست سبسڈی تننگک، پنجاب، خیبرپختونخوا ، گلگت بلتستان و آزاد کشمیر اٹی ہرخاہوت ءِ جان جوڑی کارڈ تننگک، روپئی آ زور عارضی ءِ زوت چٹک، بزغرپورٹل نا کمک اٹ چنکا بزغر آتا زوت دادرسی مریک۔ داخیال آتا درشانی ءِ او جمعہ نادے آ پاکستان سٹیزن پورٹل نا رداٹ کشارگرآتیکن خاص’’بزغرپورٹل‘‘ نا بنانا دود آن تران کرساکرے۔ داوخت آ وزیراعظم نا خصوصی کمکار نیشنل فوڈ سیکورٹی جمشید اقبال چیمہ ہم ساڑی ئسک۔ وزیراعظم پارے کہ بزگر ومزور خواری کش ءُ و مچ آ سال ہروڑنا موسم اٹی او بھاز خواری کیرہ۔ بزغر و مزور آتا کمک ءِ کننگ حکومت نا عزم ءِ۔ اللہ تعالیٰ خواری کش و مزور تپہ نا توار ءِ بِنک انتئے کہ خواری کش و مزور آتا توار ظلم و واکدار نا مون آ توننگک۔ ننا 90 درسد آن زیات چنکو بزغر ءُ ہرافتے ہروڑنا مشکل آتا مون تروئی مریک و واکدار حلقہ غاتسکان اوفتا توار سرمفک۔ اگہ علاقہ سے ٹی ظالم تھانیدار اس برے تو غٹ آن زیات چنکا بزغر اونا ظلم انا گواچی مریک۔ خلق اٹی داتوار ءِ کس اس بنپک۔ وزیراعظم پارے کہ نن انصاف نا تحریک اس چلیفین، و داعزم کریسن کہ نزور ءِ انصاف ترفنہ انتئے کہ انصاف تو درکار نزور ءِ مریک، واکدار تو تینے کانود آن ایڑتر تکک و خواہک کہ اودے این آر او ملے۔ ہراتم چنکا بزغرشونہال مریک تو پیسہ غاتے پیشن دیک و نئے لندن اٹی فلیٹ ہلیک، او تینا ڈغار آ ہی پیسہ غاتے خلیک۔ اخس بزغر شونہال مریک ملکی شونہالی ہم ودک۔ چنکا بزغرآتے بھلا بزغرآتا نسبت مارکیٹ آن مصنوعات کبین ملک، ولے تینا پیدوار نا معاوضہ اودے کم ملک و اودے تینا پیدوار ءِ اڑزآن سوداکروئی تمک۔ ہنداوڑ چنکا بزغر ءِ وام تیاہم بھاز زیات سود ادا کروئی تمک۔ وزیراعظم پارے کہ بزغرآتے شوگر ملک آتیان اوفتا فصل انا پورو معاوضہ ملیتوکہ و کٹوتی ہم کننگاکہ۔ نن دا فیصلہ کریسن کہ ہراتم حکومت بریک تو بزغرآتے اوفتا فصل انا پورو قیمت ترفنہ۔ داسہ ہراتم بزغرآتا کٹیا ودانے تو اوفتا پیدوار ہم ودانے۔ ہراتم اسکان پٹ وپول کپنہ و بج آتیا پٹ وپول مفک تو پیدوار امر ودک۔ اولیکو کشاری یونیورسٹی فیصل آباد اٹی بھاز پٹ وپول مسکہ و اونا بھلو آب اس ئس۔ ہندن ہندن پٹ وپول آ فنڈ ز خڑچ کننگ ءِ کم کننگا تو پٹ وپول ختم مس سلیس۔ دنیا ٹی ہراملک آک پٹ وپول آ خڑچ کیرہ اوفتا پیدوار ننے آن بھاز زیات ءِ۔ وزیراعظم پارے کہ پاکستان اٹی ڈگی و میئی تا داخہ بھلو کچ اس مننگ آن پد ہم ننے بارُن ءُ پاڷ درآمد کروئی تمک۔ وخت اس کہ پاڷانا پیدوار ءِ ودفنگ آ چکار تخنگتو۔ چین و یورپ اٹی پاڷانا پیدوار ننے آن کیہی ہنداخہ زیات ءِ۔ اوپارے کہ پاکستان اٹی دیر کوڑی کننگ نا لائخی بھاز کم ءِ۔ داڑآہم وخت اس کہ چکار کننگتنے۔ دیر انا دوئی کننگ ءِ ودفسا فصل آتے کن کاریم اٹ اتنگ مریک۔ پاکستان اٹی بھلو کچ اسے آ ڈغار ارے ہرافتے داتم اسکان دسنگ نا قابل جوڑ کننگتنے۔ بلوچستان نا چندی علاقہ غاتے ٹی دسوک آ کرپاس نا آب بھاز بڑزکو ءِ۔ دیر مفننگ نا سوب آن نن تینا پیدوار ءِ ودفنگ کتون۔ داسہ 50 سال آن پد 10 ڈیم جوڑ کننگ انگ ءِ۔ دیر کوڑی کننگ نالائخی ودک تو اوڑآن کشت وکشار کن دیر انا دوئی کننگ ودک و نوکاپ نا توننگ اٹ ہم کمک رسینگک۔ کوہ سلیمان آن دیر انا ترند ریلہ ءِ کاریم اٹ اتسا خشک انگاڈغار تے آباد کننگ مریک۔ داسہ اولیکو وار ہموڑے اسہ بھلو ڈیم اس جوڑ کننگ انگ ءِ۔ گومل زام ڈیم و ڈیم تا کمانڈ ایریا جوڑ مننگ آن دیر انا دوئی کننگ اٹ ہم ودکی مریک۔ بزغرآتے وام تا فراوانی آ چکار کننگ انگ ءِ۔ بزغرکارڈ آن چنکا بزغرآتے براہ راست سبسڈی ملک۔ کھد، جوجک کسفوک دوائی و ایلو مصنوعات اڑزآن ملک۔ آفت اٹی ہم اوفتا کمک ءِ کننگک۔ فصل آتا بابت بزغرآتیکن انشورنس اسہ بھاز جوان ءُ اسکیم اسے۔ داڑآن بینک ہم اوفتے کن وام تے ودفک۔ وزیراعظم پارے کہ حکومت ملک انا تاریخ اٹی اولیکو وار جان جوڑی کارڈ جاری کننگ نا بناءِ کرینے۔ گلگت بلتستان، پنجاب، خیبرپختونخواہ و آزاد کشمیر اٹی ہرخاہوت داکارڈ انا کمک اٹ 10 لکھ روپئی اسکان درمان نا آسراتی دوئی کننگ کیک۔ وزیراعظم پارے کہ فصل آتا پیدوار اٹی ودکی نا گرج ءِ اسہ سال اٹی ننا درآمدی بل 53 درسد ودانے۔ روپئی آ زور عارضی ءِ بھاز زوت چٹک۔ پاکستان کشاری ملک اس مننگ آن پد ہم تدوک آ سال 40 لکھ ٹن خولم درآمد کننگانے، ہنداوڑ بورہ، دال ، پام آئل و ڈی اے پی درآمد کننگ ءِ ہرانا سوب آن اوفتا نہاد آک بھاز ودانو۔ داسہ ملک اٹی غٹ اجناس نا پیدوار ءِ ودفنگ نا کوشست کننگ انگ ءِ۔ سویابین آ آزموندہ نا بناءِ کننگانے۔ زیتون نا دسنگ نا انقلاب اس بننگ ءِ۔ خیبرپختونخوا ٹی زیتون نا دسنگ ءِ ودفنگانے ہراڑآن زیتون نا ہنداخہ پیدوار مریک کہ نن برآمد کننگ کینہ۔ اللہ تعالیٰ پاکستان ءِ ہرگڑاتسنے، ننے پوسکن آ ٹیکنالوجی نا کمک اٹ تینا پیدوار ءِ ودفوئی ءِ۔ کشارگر آتے ہم پوسکن آٹیکنالوجی تننگک۔ بزغرآتا تربیت نا ہم بست وبند ءِ کننگک۔ سی پیک اٹ کشت وکشار ءِ اوار کننگانے ۔ چین آن نن کمک ہلنگ اُن انتئے کہ اونا پٹ وپول ننے آن بھاز زیات ءِ۔ اوریگستان اٹی ہم فصل دسینے۔ پاکستان اٹی ہم سور انگا دیر و سیم والا علاقہ غاتے ٹی ہم فصل دسنگ مریک۔ بیرہ دیر انا سہی کاریم اٹ اتنگ و پوسکن آ ٹیکنالوجی نا کاریم اٹ اتنگ ءِ پک کننگ ناءِ۔ دود آن وزیراعظم نا خصوصی کمکار نیشنل فوڈ سیکورٹی جمشید اقبال چیمہ ہم تران کرے۔
