کوئٹہ۔ 15 اکتوبر (اے پی پی) گورنر بلوچستان سید ظہور احمد آغا پارینے کہ راج انا حقی شونداری نا سیبو پائیدار و سوگو زرگزرانی نظام آٹے۔ دارداٹ ننے قوم انا زرگزرانی شونداری کن راج انا عظیم گیشتری نا شرکت و اوار مننگ ءِ پک کروئی مریک، بلوچستان نا زرگزرانی شونداری آن پاکستان نا شونداری ءِ سوگوی ملک۔ داخیال آتا درشانی ءِ او جمعہ نادے آ اسلام آباد اٹی بنجائی وزیر ڈٹ بندی و شونداری اسد عمر تون اوڑدہی ٹی گپ وتران کرسا کرے، داوخت آ گورنر بلوچستان پارے کہ منٹ منٹ آ بدل مروک آ دنیا ٹی تینا قومی اولیت آتا تعین المی ءِ، بلوچستان اٹی پوسکن آ وخت انا پوسکن آ خواست آتے مون آ تخسا ننے مریس مد و گونڈ مد ڈٹ بندی کروئی مرے تانکہ ننا ساڑی و آخبت نا گرج آتے پورو کننگ اٹ آسانی ودی مننگ کے ہنداوڑ ملک وصوبہ ٹی پسماندگی نا چٹفنگ، روزگار نا گیشتر وارخوائی دوبننگ و شونداری نا پوسکنءُ کسر ملنگک۔ گورنر بلوچستان پارے کہ بلوچستان تینا محل و وقوع نا اعتبار اٹ خاص ءُ اہمیت اس تخک و زرگزرانی شونداری نا بابت دا سینٹر ایشیااسکان زرگزرانی و واپاری کسر اس فراوان کننگ کیک، گورنر بلوچستان پارے کہ سی پیک کون آ شاندار میگاپروجیکٹ نا رداٹ مچ آ صوبہ ٹی فنی و تیکنیکی ہند آتے فعال کننگ المی ءِ، داوخت آ بنجائی وزیر اسد عمر پارے کہ داوخت آ بنجائی پی ایس ڈی پی نا رداٹ صوبہ بلوچستان اٹی کل 230 چنکا بھلا شونداری ڈٹ آک برجاءُ و بحیثیت گورنر بلوچستان نی دا غٹ برجا شونداری ڈٹ آتیا سخت نظرتخ، کاریم اٹ اتوک آ میٹریل آتا آب و کاریم نا رفتار نا وقتا فوقتا جاچ ءِ ہلسا کر تانکہ اوفتا پوروی آن زوت نیزگار الس ءِ دا ڈٹ آتا بھرمک رسینگ کیر، وزیراعظم پاکستان عمران خان نا وژن نا رداٹ الس نا پیسہ الس ہی نا راجی آسراتی آ خڑچ کننگے انتئے کہ ڈٹ آتیا خڑچ مروک آ زر الس نا امانت ءِ، اسد عمر باور کرفے کہ بنجائی حکومت بھاز زوت قطبی بلوچستان نا پسماندہ ضلع غاتے ٹی ہم پوسکن آ شونداری ڈٹ آتا بنا ءِ کیک، ہڑتوم آ راہشونک داہیت آ امنا کریر کہ بلوچستان اٹی تحصیل نا کہول آ پوسکن آ چینءِ پوسکن آ مہارت ہیل تننگ وخت انا اہم ءُ گرج اسے۔
