اسلام آباد۔ 15 اکتوبر (اے پی پی) بنجائی وزیر حوالکاری و شینکاری چوہدری فواد حسین پارینے کہ رسول اکرم ﷺ نا ذات اقدس حق انا کلہو ءِ، اودے مون آ تخسا نن مون آ کانہ، عشرہ رحمت اللعالمین نا دود آتا وخت آ ’’پیغام پاکستان‘‘ نا بابت الس اٹی آگاہی ودی کرسا نن اسہ ہندن ءُ راج اسے نا ٹہیفنگ ءِ ممکن کننگ اُن ہرا رواداری و سگ آ مبنی مرے۔ داخیال آتا درشانی ءِ او جمعہ نادے آ داڑے بنجائی وزیر مذہبی امور پیر نور الحق قادری تون اوار 12 ربیع الاول یوم ولادت رسول ﷺ نا وخت آ دود آتا بابت بست وبند آتا جاچ ءِ ہلنگ کن دیوان نا کماشی ءِ کرسا کرے۔ داوخت آ سینیٹ ناقائمہ کمیٹی حوالکاری و شینکاری نا چیئرمین سینیٹر فیصل جاوید ہم ساڑی ئسک۔ بنجائی وزیر حوالکاری پارے کہ نبی کریم ﷺ نا سیرت طیبہ و اونا تعلیمات مچ آ راج اکن عملی ءُ نمونہ سے ءُ، نن سیرت طیبہ ءِ عملی وڑاٹ تینا زنداٹی اتین۔ دیوان اٹی گپ وتران کرسا بنجائی وزیر مذہبی امور پیر نور الحق قادری پارے کہ نن تینا زند ءِ اسوہ رسول نا رداٹ شاغسا تینا ویل آتا ایسر اس کشنگ کینہ۔ اودیوان ءِ پارے کہ عشرہ شان رحمت نا چرجوئی ٹی وزارت مذہبی امور 20 اکتوبر اسکان چندی سرحال آتا شیڈول اس جاری کرینے۔ او داسرحال آتے مون آتخسا سیرت کانفرنس آتا اڈتننگ آ زور شاغا۔ اوپارے کہ رحمت اللعالمین ﷺ اتھارٹی نا قیام نا پڑو ستاکڑزک، دا اتھارٹی نا کمک اٹ ورناچین ءِ مسلمان تا تاریخ و اسلامی انقلاب نا پلو آتیان روشناس کرفنگک۔ داکان مست دیوان ٹی عید میلادالنبی ﷺ نا دود انا تیاری و رحمت اللعالمین ﷺ اسکالر شپ نا بابت سرجم گپ وتران مس۔ دیوان ءِ پاننگاکہ12 ربیع الاول آ اِرابھلو دود مریک، اسہ دود اس ایوان صدر و ایلو کنونشن سینٹر اٹی مریک۔ وزیراعظم بھلو مذہبی مچی اسے آن تران کیک۔
